حکومت ملک اٹی گوازی تا جان جوڑ کلچر نا است بڈی کن پرعزم ءِ اومیت ءِ پاکستان اٹی زوت گوازی تا ایلو جہانی مقابلہ غاک مریر، صدر مملکت ممنون حسین پاکستان کرکٹ بورڈ ، چیئرمین پی ایس ایل ، پشاور زلمی ءِ مبارکبادی تس

اسلام آباد(پاکستان نیوز پوائنٹ 06مارچ2017ء) صدر مملکت ممنون حسین پارینے کہ گوازی جان جوڑی سرجزآتے کن بھاز جوان ءِ ، سجفنگ نا عمل اٹی ودکی ودی کیک و راج اٹی صبر و ڈسپلن نا اقدار ءِ مون آ دیک۔ صدر مملکت پارے کہ حکومت ملک اٹی گوازی تا جان جوڑ کلچر نا است بڈی کن پرعزم ءِ و پاکستان سپرلیگ نا فائنل میچ انا سرسہب اڈتننگ داکنڈا اسہ گام اسے۔ صدر مملکت دا اومیت نا درشانی ءِ کرے کہ پاکستان اٹی زوت کرکٹ ہی آخا بلکن گوازی تا ایلو جہانی مقابلہ غاک مریر۔

صدر مملکت پی ایس ایل فائنل ءِ لاہور اٹی سرسہبی اٹ کرفنگ آ پاکستان کرکٹ بورڈ و چیئرمین پی ایس ایل نجم سیٹھی ءِ مبارکبادی تس۔ اومستی پارے کہ میچ اٹی خلقت نا جوش وجوزہ دہشت گردی و انتہاپسندی نا برخلاف قوم انا عزم انا اعادہ ءِ کیک۔ صدر مملکت جوان گوازی نشان تننگ آ پی ایس ایل نا غٹ ٹیم و پشاور زلمی ءِ ٹورنامنٹ ءِ کٹنگ آ مبارکبادی تس۔ صدر مملکت فائنل میچ اٹی شاندار بست و بند و فول پروف سیکورٹی فراوان کننگ آ حکومت پنجاب و کانود نافذ کروک آ ادارہ غاتا خذمت آتا ستاءِ کرے۔