اسلام آباد(پاکستان نیوز پوائنٹ 01مارچ2017ء) پاکستان اٹی اوغانستان نا سفیر عمر زاخیل وال دا عزم انا اعادہ ءِ کرینے کہ اوغانستان اقتصادی کمکار تنظیم ( ای سی او) نا غرض و مسخت آتے عملی دروشم اس تننگ کن پرعزم ءِ۔ علاقائی رابطہ غاتے مون آ دننگ کن باسک ملک آتیٹی امن و سوگوی المی ءِ، وزیراعظم محمد نواز شریف نا سروکی ٹی ای سی او بڑزی نا پوسکن آ کہول اسکان سرمریک۔
چارشنبے نا دے داڑے 13می اقتصادی کمکار تنظیم (اے سی او) سروک دیوان آن تران کرسا اوڈیہہ نا وسیلہ غاتے غٹ باسک ملک آتا فائدہ کن کاریم اٹ اتنگ نا گرج آ زورشاغا۔ اوپارے کہ غٹ باسک ملک آک اسیجائی حکمت عملی آ عملدرآمد نا کمک اٹ نیزگاری و ایلو چیلنج آتا مون ءِ توننگ کیرہ۔ اوغان سفیر جنگ آن زہمی اوغانستان کن پبی کمکاری ظاہر کننگ آ سروک دیوان اٹی ساڑی غٹ سروک آتا منت واری ءِ ادا کرے۔
اواومیت ظاہر کرے کہ وزیراعظم نواز شریف نا سروکی ٹی ای سی او بڑزی تا پوسکن آ کہول اسکان سرمریک و اوغانستان دا چرجوئی ٹی پورو کمک فراوان کیک۔ اقوام متحدہ نا سیکرٹری جنرل نا خصوصی نمائندہ ہم سروک دیوان آن تران کرے۔ اوپارے کہ جہانی ادارہ شونداری، امن و انسانی وسیلہ غاتون اوار چندی بشخ آتیٹی ای سی او نا باسک ملک آتون کاریم کننگ ءِ۔ اوپارے کہ اقوام متحدہ ای سی او ایجنڈا نا مخ تفی کن تیار ءِ ۔ اوپارے کہ ڈیہہ نا اقتصادی شونداری کن تنظیم نا باسک ملک آتے تینا وسیلہ غاتا بایدے تبادلہ کروئی مرے۔
