اسلام آباد(پاکستان نیوز پوائنٹ 01مارچ2017ء) ترکمانستان نا صدر قربان گل بردی محمدوف پارینے کہ تاپی گیس ڈٹ آعملدرآمد برجاءِ ، اقتصادی کمکار تنظیم باسک ملک آتا نیام اٹ جوڑ جاڑی مذاکرات کن اہم ءُ فورم اسے، ای سی او باسک ملک آتا شونداری نا کسرتے متعین کرینے۔ چارشنبے نا دے داڑے 13می اقتصادی کمکار تنظیم (ای سی او) سروک دیوان آن تران کرسا ترکمن صدر پارے کہ ای سی او اہم معاملہ خاص کر سلامتی ٹی شریداری ءِ مون آ دننگ کن نمان لائخی تخک۔
او ای سی او نا باسک ملک آتا نیام اٹ توانائی نا بشخ اٹی کمکاری نا گرج آ زورشاغا و پارے کہ ترکمانستان نا توانائی پالیسی کثیر الجہتی حکمت عملی آٹی ءِ۔ اوپارے کہ تاپی گیس پیپ لین ڈٹ انا جوڑ جاڑ نا کاریم نا بناء کننگانے و ای سی او ملک آتا شرکت آن دا ڈٹ ءِ عملی جامہ بیرفنگانے۔ اوپارے کہ ای سی او ملک آک ڈیہہ نا شونداری نا سمت ءِ متعین کرے۔ ڈیہہ نا ملک آتے قابل تجدید توانائی آ چکار تخنگ نا گرج ءِ۔
اوپارے کہ ترکمانستان ، پاکستان و اوغانستان آ تالان سہ کڑدہ ہی ڈٹ آتا رداٹ فائبر آپٹک ڈٹ آتیا ہم کاریم مننگ ءِ۔ اوپارے کہ اقتصادی راہداری آن جہانی امن ءِ مون آ دننگ مریک۔ ترکمن صدر پارے کہ اوغانستان اٹی امن مچ آ ڈیہہ کن کلیدی حیثیت تخک، اوغانستان اٹی امن ڈیہہ و تینٹ اوغانستان نا فائدہ ٹی ءِ۔
