اسلام آباد(پاکستان نیوز پوائنٹ 22فروری2016ء) سپریم کورٹ پاناما لیکس نا سماعت اینوپنچ شنبے نا سہب اسکان ملتوی کرینے وخت اس کہ اٹارنی جنرل نا کنڈآن عدالت ءِ پاننگانے کہ حدیبیہ پیپرملز ریفرنس و پاناما لیکس کیس اِرا جتاوڑنا مقدمہ ءُ، ہنداخاطران حدیبیہ پیپرملز ریفرنس ءِ پاناما لیکس کیس تون گنڈنگ مفک۔ چارشنبے آ جسٹس آصف سعید کھوسہ نا سروکی ٹی جسٹس اعجاز افضل ، جسٹس گلزار احمد، جسٹس شیخ عظمت سعید و جسٹس اعجاز الاحسن آ تالان پنچ باسکی لارجربنچ کیس انا سماعت ءِ کرے۔
اٹارنی جنرل اشتراوصاف تینا دلیل آتے برجاتخسا موقف تینا کرے کہ شریف خاہوت نا برخلاف حدیبیہ پیپرملز ریفرنس ءِ پاناما کیس تون گنڈنگ مفک دا بالکل جتا وڑنا کیس اسے ولے اگہ کسس خوائے تو او حدیبیہ پیپرملز ریفرنس نا بابت لاہور ہائیکورٹ نا فیصلہ نا برخلاف اپیل دائر کننگ کیک۔ اونا پاننگ ئس کہ پی ٹی آئی پاناما پیپرزلیکس نا بارواٹی متنازعہ دستاویز آتے عدالت اٹی جمع کرفینے ہنداخاطران عدالت دا کیس آ فیصلہ تننگ کپک، کنا کاریم عدالت نا مون آ حق آتے اتنگ نا ءِ۔
جسٹس آصف سعید کھوسہ اٹارنی جنرل ءِ پارے کہ نی ریاست نا نمائندگی ءِ کننگ اُس، و حدیبیہ کیس اٹی ریاست مدعی ئس۔ ہراڑآ اٹارنی جنرل پارے کہ اوبنجانا وکالت آخا، بلکن عدالت نا کمک ءِ کننگ ءِ و عدالت نا مون آ ریکارڈ آن حق آتے مون آ اتنگ ءِ ، کانود نا رداٹ عدالتی فیصلہ غاتا برخلاف ہراسٹ اپیل دائر کننگ کیک۔ جسٹس اعجاز افضل اوڑتون پارے کہ اپیل نا حق تعلقدار کڑدہ ءِ مریک، غیر تعلقدار بندغ ہراوڑ اپیل کننگ کیک۔
اٹارنی جنرل پارے کہ آئین اٹی دا ہیت آ ہچ ءُ پابندی اس اف، اپیل دائر کننگ نا بھاز ءُ کسر ارے۔ اٹارنی جنرل پارے کہ آئین نا رداٹ نااہلی کن ریفرنس اسپیکر ءِ گدریفنگ مریک ، ولے اسپیکر آن فیصلہ مفننگ نا دروشم اٹی ہی پین فورم اسے تون رجوع کننگ مریک۔ اٹارنی جنرل پارے کہ آئین آرٹیکل 63ڈکلیریشن تننگ نا موکل تفک، سوج دادے کہ انت عدالت ءِ تینا اختیار ءِ کاریم اٹ اتوئی مرے۔
داڑے داسوج ہم چست مریک کہ عدالت ہراحد اسکان ہِننگ کیک۔ اٹارنی جنرل پارے کہ اسمبلی نا باسک اسے نا نابودی کن آئین اٹی وڑوڈول درج ءِ، ایم این اے پبلک آفس ہولڈر مفک، ننا ادارہ غاتا وقار ءِ پیشن نا ملک مجروح کننگانے، عدالت آئین ءِ مون آ تخے، آرٹیکل 62اٹی السی عہدہ نا ذکر اف، ولے ہر گچین مروک نمائندہ میرات آتا سرجم آتے جمع کرفنگ نا پابند مریک ، ولے اگہ میرات آتے ڈکے یا غلط بیان کروئے تو اونا برخلاف سیشن کورٹ اٹی مقدمہ کننگ مریک، ہراٹی مسہ سال بند و پنچ ہزار روپئی جرمانہ یا ہڑتوم آ سزاک مننگ کیرہ، اوالسی نمائندگی ایکٹ نا سیکشن 42اے نا حوالہ ءِ ترسا پارے کہ پندارکاغد آتیٹی غلط بیان کروک آتا برخلاف فوجداری مقدمہ مننگ کیک سیشن کورٹ اٹی ٹرائل کروئی تمک و داڑکن شاہدی ریکارڈ کروئی مریک۔
جسٹس کھوسہ پارے کہ فوجداری معاملہ غا عدالت بیدس جاست و پاست ہچ ءُ فیصلہ اس تننگ کپک، اٹارنی جنرل آن پد چیئرمین پی ٹی آئی عمران خان نا وکیل نعیم بخاری نا دلیل آک برجائسر کہ عدالت سماعت ءِ اینو پنچ شنبے نا سہب اسکان ملتوی کرے۔
