انقرہ(پاکستان نیوز پوائنٹ 22فروری2016ء) وزیراعظم محمد نواز شریف ترکی نا مسہ دے ئی سرکاری دورہ غا چارشنبے نا دے انقرہ نا بالی پٹ ایسن بوگا غا سرمس تو اودے جم و جوش اٹ بخیر کننگا۔ بالی پٹ آ ترکی نا بنجائی وزیر گوازی و نوجوانان عاکف کاگاتے کلک، سینئر پارلیمنٹرین و انقرہ نا نائب گورنر وزیراعظم نا خیرمقدم ءِ کریر۔ اِرا چنکو چنا اودے و بیگم کلثوم نوازءِ پھل آتا دستہ اس پیش کریر۔
وزیر پٹرولیم و قدرتی وسیلہ شاہد خاقان عباسی ، وزیر واپار خرم دستگیر ، خصوصی کمکار امور خارجہ طارق فاطمی وزیراعظم تون اوار ءُ۔ انقرہ ٹی اڈ کننگ نا وخت وزیراعظم تینا ترک ہم منصب بن علی یلدرم تون اوار بڑزکو کہولی سٹریٹجی کمکار کونسل نا پنچ می دیوان اٹی شریک کماشی ءِ کیک۔ ترک وزیراعظم تون ایلو اختہ ہی تیان بیدس وزیراعظم محمد نواز شریف نا پروگرام اٹی ترک صدر رجب طیب اردگان تون اوڑدہی ہم اوار ءِ۔ وزیراعظم ترکی ٹی جولائی 2016 ء نا بے سہب بغاوت آن پد ترک سروک و جمہوری ادارہ غاتون پاکستان نا ٹھوس یکجہتی نا درشانی کن ترک پارلیمنٹ نا ہم دورہ ءِ کیک۔
