اسلام آباد(پاکستان نیوزپوائنٹ 27مارچ2018ء) پاک بحریہ 25می نیشنل شوٹنگ چیمپئن شپ انا اعزاز ءِ تینا پن آ کرے وخت اس کہ پاکستان آرمی ایونٹ اٹی ارٹ میکو پوزیشن ءِ ہلک۔ پاکستان نیوی نا شوٹنگ ٹیم عمدہ کارکڑد نشان ترسا 20 گولڈ ، 14چاندی و 11کانسی نا تمغہ ہلک۔ چیمپئن شپ انا ایسری و انعام آتا بشخ وپانٹ انا دود سے شنبے نادے پاکستان نیوی شوٹنگ رینج کارساز اٹی اڈ ہلک۔
کمانڈر کراچی ریئر ایڈمرل اطہر مختار دود انا مہمان خاص ئس ہرا کٹوک آ گوازی گر آتے ٹی انعام بشخ وپانٹ کرے۔ پاکستان نیوی نا غفران عادل رائفل ایونٹ اٹی سرفہرست مس و چیمپئن شپ انا گچین گوازی گر گوندنگا۔ مہمان خاص دود آن تران کرسا پارے کہ شوٹنگ اسہ گوازی اسے نا وڑاٹ سلہہ بند فوج آن بیدس قومی کہول آ ہم نمان حیثیت اس دوئی کننگ ءِ۔ اوپارے کہ شوٹنگ نا مقابلہ غاتے ٹی سلہہ بند فوج انا گوازی گرآتیان بیدس ننا ورناک ملک انا پن ءِ روشنا کننگ کن زیات آن زیات بشخ ہلنگ ءُ۔
ریئر ایڈمرل اطہر مختار پارے کہ ننا ورناک اسہ گچین ءُ شوٹراس جوڑ مننگ نا لائخی و استعداد اس تخرہ و ہنداوڑانا مقابلہ غاک ورناشوٹرز آتے نئے بیرہ تینا اہلیت نا نشان تننگ نا موقع فراوان کیک بلکن اوفتے قومی و جہانی کہول آ تینا لائخی تے مون آ اتنگ کن متحرک ہم کیک۔ شوٹنگ نا دا ہفت دے ئی مقابلہ پاک بحریہ نا کنڈآن 21آن 27مارچ 2018 پاکستان نیوی شوٹنگ رینج اٹی اڈ تننگا ہراٹی آرمی، نیوی ، ایئر فورس، پنجاپ، سندھ، واپڈا، فیڈرل رائفل ایسوسی ایشن و خیبر پختونخوانا ٹیمک بشخ ہلکر و شوٹنگ نا گوازی ٹی تینا لائخی تے نشان تسر۔
جتا ٹیم تا کنڈآن کٹوک آ میڈل آتا سرجم آتا رداٹ نیوی نا 45، آرمی نا 39، ایئر فورس انا 8، پنجاپ، سندھ انا اِرٹ ،اِرٹ ، واپڈا 8، ایف آر اے نا اسہ و کے پی کے نا اسہ میڈل اس ہم دوئی کننگ کتو۔
