پاکستان و ویسٹ انڈیز نا نیام اٹ مسٹ میکو و آخریکو ون ڈے انٹرنیشنل کرکٹ میچ (اینو) گوازی کننگک گرین شرٹس ءِ مسہ میچ آتا سیریز آتیٹی 2-0نا فیصلہ کن برتری

ابوظہنی (پاکستان نیوز پوائنٹ 04اکتوبر2016ء) پاکستان و ویسٹ انڈیز ناکرکٹ ٹیم تا نیام اٹ مسٹ میکو وآخریکو ون ڈے انٹرنیشنل (اینو) چارشنبے آ شیخ زید سٹیٹیم ، ابوظہنی ٹی گوازی کننگک۔ گرین شرٹس ءِ مسہ میچ آتا سیریز اٹی 2-0نا فیصلہ کن برتری دوئی ءِ۔ شارجہ ٹی گوازی کروک آ اولیکومیچ اٹی پاکستان 111رنز و ارٹ میکو میچ اٹی 59رنز اٹ فتح دوئی کرے۔ ون ڈے سیریز آن بیدس ہڑتوم آ ٹیم تا نیام اٹ مسہ ٹیسٹ میچ آک ہم گوازی کننگرہ داچرجوئی ٹی اولیکو ٹیسٹ 13آن 17 اکتوبر اسکان دبئی، ارٹ میکو ٹیسٹ 21آن 25اکتوبر اسکان ابوظہنی وخت اس کہ مسٹ میکو و آخریکو ٹیسٹ میچ 30اکتوبر آن 3نومبر اسکان شارجہ ٹی گوازی کننگک۔