کوئٹہ (پاکستان پوائنٹ نیو ز 29۔جولائی۔2016ء) خطیب جامع غوثیہ مسجد گنداخہ ڈاکٹر مولانا خوشی محمد قادری پارے کہ 69می آجوئی دے ءِ شون و شان وڑاٹ اڈتننگک، ننے آجوئی ءِ کسس خیرات اٹی تتنے بلکن آجوئی لازوال قربانی تیان پد ہی ملانے نن بایدے تینا آجوئی نا قدر ءِ کین۔ داخیال آتا درشانی ءِ او گنداخہ جعفرآباد اٹی جمعہ مبارک نا وخت آ مچی آن تران کرسا کرے۔
اوپارے کہ جشن آجوئی اڈتننگ نا مسخت دادے کہ نن اسہ زندہ قوم اسے اُن و ہراقومک تینا آجوئی نا قدر ءِ کپسہ او ہمیش غیر آتا غلام مریرہ پاکستا ن ءِ جوڑ کننگ کن ننا باوہ و پیرہ بے شمار قربانی تسنو و اوکان پد ہنسا ننے اسہ آجو ملک پاکستان نصیب مسنے ننے تینا ملک انا قدر ءِ کروئی مرے بلکن نن غٹ پاکستانی اُن اسہ قوم اسے کس اسیا برتری دوئی اف بلکن پاکستان اٹی ہلوک آ غٹ قوم آک اسٹ ہی ءُ و ہچ ءُ پیشن نا تہہ نا سازش اس ننے جتا کننگ کپک بلکن ننا اسہ ہی پہچان اسے و دادے کہ نن غٹ پاکستانی و مسلمان اُن۔ اوپارے کہ نن اینو نا دے داعہد ءِ کین کہ تینا وطن عزیز نا دفاع نا خاطر ہمیش متحد مرینہ و داملک انا بقاء و سلامتی ہمیش اسہ بیرک اسینا کیرغ آن متحد مرینہ۔
