اسلام آباد(پاکستان نیوز پوائنٹ 12جنوری2016ء) پاکستان مسلم لیگ (ن) نا راہشون و باسک قومی اسمبلی دانیال عزیز پارینے کہ تحریک انصاف عدالت اٹی پاناما کیس آ قلابازی کُننگ ءِ ، وزیراعظم محمد نواز شریف نا پارلیمنٹ اٹی تقریر و عدالت اٹی موقف اٹی ہچ ءُ تضاد اس اف۔ سپریم کورٹ نا پیشن میڈیا تون ہیت وگپ کرسا اوفک پاریر کہ جتا داوا کروک آ پی ٹی آئی کن غٹ آن اہم ءُ دے اس اینو نا ئس و اینو ہی اونا ”سٹپنی وکیل“ عدالت اٹی پیش متو۔
دانیال عزیز پارے کہ اولیکو وار پاکستان مسلم لیگ (ن) نا وکیل ءِ عدالت اٹی دلیل تننگ نا موقع ملانے و اواوڑتون مون تننگ کتوس۔ پی ٹی آئی نا شکست وریخت نا نشانیک مون آ بننگ نا بناءِ کرینو۔ اوفک پاریر کہ داڑآن مست پی ٹی آئی نا کنڈآن دوبہ خلنگاسس کہ الیکشن دُزی مس وخت اس کہ حقیقت اٹی دُن متویسس وپاکستان نا تاریخ اٹی اولیکو وار عدالت فیصلہ ترسا گوندا کہ ہچ ءُ دھاندلی اس متنے و عدالت غٹ دوبہ غاتے مسترد کرے۔
دانیال عزیز پارے کہ پی ٹی آئی دا بیان آتیان الس ءِ داہیت انا پک کرفنگ ءِ کہ دا جماعت نا لیڈرشپ نواریفنگ اٹی کاریم ہلنگ ءِ۔ اوپارے کہ پی ٹی آئی نا ہیت آتیٹی راستکی اف، وار وار تینا سیاسی مسخت آتا دوئی کن دروغ تڑنگ ءِ ، قوم انا مون آ اونا اصل چہرہ پاش مسنے۔ دانیال عزیز پارے کہ عدالت نا مون آ داسہ واویلا کننگ انگ ءِ کہ دا کیس کرپشن نا اف بلکن وزیراعظم نا پارلیمنٹ اٹی کروک آ تقریر نا برخلاف ءِ۔
اوفک پاریر کہ وزیراعظم محمد نواز شریف واوار دا پارینے کہ نن عمران خان نا دھڑکو تا ورندی ءِ تننگ نا مجاز افن ولے غٹ شاہدی تے مناسب فورم نا مون آ پیش کننگک۔ اوفک پاریر کہ دوبہ غاتا بناء مننگ آن مست اولیکو دے ہی وزیراعظم صاحب کمیشن اس جوڑ کننگ کن چھٹی اس نوشتہ کریسس و وزیراعظم تین تون اوار چناتے عدالت نا مون آ احتساب کن پیش کرے ولے عمران خان داسہ عدالتی کارروائی آن نرنگ نا کوشست کننگ ءِ۔
مسلم لیگ (ن) نا راہشون پارے کہ اینو عدالت نا مون آ اونا وکیل وزیراعظم نا پارلیمنٹ اٹی کروک آ تقریر ءِ خوانسا بنفے و پارے کہ دا تقریر وزیراعظم نا خاہوت نا کاروبار نا سرجم ءِ، عدالت اٹی پیش کروک شاہدی و پارلیمنٹ نا تقریر اٹی تضاد اف۔ دابیان آن پد پی ٹی آئی نا اسہ اسہ داوا غلط ثابت مسنو۔ تحریک انصاف سیاسی مسخت آتا دوئی کن دھوکہ تننگ اٹ کاریم ہلنگ ءِ کنٹینر نا دوبہ و عدالتی شاہدی تیان دروغ صفا مسنے۔ داوخت آ پاکستان مسلم لیگ (ن) نا راہشون مائزہ حمید پارے کہ نن ہیت ہم کرینن و شاہدی ہم پیش کرینن۔ اسہ ہیت اس ثابت شدہ ءِ کہ پاناما پیپرز اٹی وزیراعظم نا پن اف۔ اوپارے کہ عمران خان حکومت نا گچین کارکڑد آن فریشان ءِ ہنداخاطران دوبہ خلنگ نا سیبو ءِ ہلنگ انگ ءِ۔
