اسلام آباد(پاکستان نیوز پوائنٹ 11جنوری2016ء) وزیراعظم محمد نواز شریف پارینے کہ اقلیت آتا حق انا رکھ ءِ المی جوڑ کننگک و اوفتے راج اٹی روا ہند ترفنگ کن ہروڑنا کوشست کننگک ، ہمودے مر اف ہراتم پاکستان ءِ جہانی کہول آ اقلیت دوست ملک انا وڑاٹ چائنگک، قوم ءِ تہاری تیٹی بٹوک و شونداری نا کسر ءِ توروک آتے ورندی تروئی تمک۔ نن سلوک ءُ افن ، نن خلقت نا گچینی ، شونہالی و بے روزگاری نا چٹفنگ کن کاریم کرسا کینہ، مچ آ ملک انا موٹرویز ننا دوتے اٹ جوڑ مسنو ، 1999 و 2013نا نیام انا مد اٹی ہچ ءُ موٹروے اس جوڑ متنے ، 2013ء آن مست ہردے بمب دھماکہ مسکہ ، مسلمان مسلمان ءِ خلککہ ، اللہ ننا کمک ءِ کرے و دہشت گردی نا ہم مون ءِ توننگ انگ ءِ ، پاکستان معاشی سوگوی دوئی کرینے، ہرادے امنا دنیا نا پنی آ ادارہ غاک کننگ ءُ، معاشی ٹک آک مست آن بھاز جوان مسنو، شرح نمو ہرا گدرینگوک آسال 4.7درسد ئس و او داسال 5.5درسد مریک و بروک آ اِرا سال اٹی 7درسد آن زیات مریک۔
باباگرونانک و گندھارا یونیورسٹی نا اڈتننگ نا چرجوئی ٹی ہر وڑ کمک و تعاون فراوان کینہ۔ او چارشنبے آ کٹاس راج انا دورہ نا وخت آ واٹر فلٹریشن پلانٹ نا افتتاح ءِ کننگ آن پد مچی آن تران کریکہ۔ بنجائی وزیر مذہبی امور بین المذاہب ہم آہنگی سردارمحمد یوسف ، چیئرمین متروکہ وقف املاک بورڈ صدیق الفاروق ، ایم این اے ڈاکٹر درشن ، اسفن یاربھنڈر و اقلیتی برادری تا نمائندہ غاک ہم داوخت آ ساڑی ئسر ۔
وزیراعظم محمد نواز شریف پارے کہ او غٹ پاکستانی تا وزیراعظم ءِ و دا اونا مذہبی فرض ءِ کہ او ملک انا ہر شاری نا بے پرخ خیال ءِ تخے۔ اوپارے کہ آثار قدیمہ نا بابت کٹاس راج ءِ بھلو اہمیت اس دوئی ءِ ہرا 4تہذیب آتا سنگم ءِ ، اینو نا مچی مچ آ دنیا ءِ کلہو اس تننگ ءِ کہ پاکستان اٹی رہینگوک آ اقلیت آتے بریبر نا شاری سرپند کننگک۔ اوپارے کہ غٹ اقلیت آک پاکستان نا دفاع ، امن ، شونداری و شونہالی کن دوتے اٹ دوتے شاغسا کاریم کننگ ءُ ۔
اوپارے کہ مذہب غٹ انا تینا تینا ولے انسانیت ننا اسیجائی اساس ءِ ، ای جندی وڑاٹ اقلیت آتا خوشی تیٹی ساڑی مریوہ، پاکستانی اسے نا وڑاٹ ننا خوشی و ڈکھ آک اسٹ ءُ۔ وزیراعظم محمد نواز شریف پارے کہ او باباگرونانک و گندھارایونیورسٹی نا اڈتننگ نا چرجوئی ٹی ہروڑنا کمک فراوان کینہ۔ اوپارے کہ ہمودے مر اف ہراتم پاکستان ءِ جہانی کہول آ اقلیت دوست ملک اسے نا وڑاٹ چائنگک۔
اوپارے کہ حضور ﷺ اقلیت آتا رکھ انا ضمانت تسوسس، ہر مذہب شرف، سیوت و اتفاق نا سبخ ایتک ۔ وزیراعظم پارے کہ پاکستان اٹی جتا مذہب ااتا مقدس ہندآک اریر۔ دابابت او صدیق الفاروق ءِ صفا پارت کرے کہ درملکی یاتری تا میزبانی و اوفتا مذہبی ہند آتا رکھ ، زیب وزینت و ودیکی نا چرجوئی ٹی ہر حد اسکان ہِننگے، اقلیت آتا خذمت آن پاکستان سوگو مریک و دا نیک انگا کاریم آن اللہ تعالیٰ ہم خوش مریک۔
اوپارے کہ ساڑی حکومت ایلو مد اٹی بھاز گڑا کروئی ءِ انتئے کہ ماضی نا حکومت آک ہچ اس کتوس ، پاکستانی ءِ تہاری تیٹی بٹیر ہلار۔ 16، 16گھنٹہ نا لوڈشیڈنگ مسکہ، قوم ءِ تہاری تیٹی بٹوک آتے ورندی تروئی مریک و اینو ہراک شونداری نا کسر ءِ توننگ ءُ اوفتے ہم ورندی تروئی مریک ، نن اوفتے پاننگ خوانہ کہ نن سلوک ءُ افن ، نن خلقت نا گچینی ، شونہالی و بے روزگاری نا چٹفنگ اسکان کاریم کرسا کینہ۔
اوپارے کہ ساڑی حکومت نا کوشست آتیان ملک انا تہٹی بے روزگاری ، نیزگاری و پسماندگی کم مننگ ءِ ، جوڑ جاڑ و شونداری نا ڈٹ آتیا ترندی اٹ کاریم برجاءِ۔ پوسکن آ پاکستان ءِ جوڑ کروک آک ہچ اس جوڑ کننگ افس، داغٹ ءِ نن جوڑ کننگ اُن ، اگہ اوفک پارہ تو نن اوفتا پن انا تختی اس خلینہ۔ وزیراعظم پارے کہ روڈآتا جال اس شاغنگ انگ ءِ ، انشاء اللہ مچ آ ملک اٹی موٹروے تے ننا دوتے اٹ جوڑ مروئی ءِ۔
ایم این اے ڈاکٹر درشن پارے کہ اینو نا دے تاریخی ءِ، وزیراعظم نا دورہ کٹاس راج اونا اقلیت اتون مابت نا شاہدی ءِ۔ اوپارے کہ وزیراعظم اقلیت آتے رکھ انا احساس ترفینے ہراڑآن اوفتا پت بحال مسنے۔ اوپارے کہ وزیراعظم سویلی ایشیانا اسٹ انگا شخصیت ءِ ہراامن کن ہمیشہ مون آ برسا کڑد ادا کرے۔ داوخت آ ایم این اے اسفن یار بھنڈر و بشب الیگزینڈر جان ملک ہم تران کریر۔ داکان مست ووزیراعظم محمد نواز شریف کٹاس راج اٹی ہندوتا تاریخی مندرنا کیہی بشخ آتے ہرا و واٹر فلٹریشن پلانٹ نا افتتاح ءِ کرے ۔ داوخت آ او کٹاس راج اٹی نیال اس ہم خلک۔
