اسلام آباد(پاکستان نیوز پوائنٹ 10جنوری2016ء) اسپیکر قومی اسمبلی سردار ایاز صادق نا کماشی ٹی فوجی عدالت آتا بابت پارلیمانی لیڈرآتا صلابتی دیوان سے شنبے آ پارلیمنٹ ہاؤس اٹی مس ہراٹی بنجائی وزراء زاہد حامد، شیخ آفتاب احمد ، اکرم خان درانی ، قومی اسمبلی ٹی قائد حزب اختلاف سید خورشید احمد شاہ، پیپلزپارٹی نا پارلیمانی لیڈر سید نوید قمر، آفتاب احمد خان شیر پاؤ، ڈاکٹر فاروق ستار ، حاجی غلام احمد بلور ، شاہ محمود قریشی ، ڈاکٹر شیریں مزاری، صاحبزاد ہ طارق اللہ و حاجی شاہ جی گل آفریدی ئسک بشخ ہلکر۔
دیوان آن پد اسپیکر قومی اسمبلی سردار ایاز صادق گونڈ ءُ ہیت وگپ اسے ٹی پارے کہ اینو دا معاملہ غا صاف ہیت وگپ کننگانے کہ داچرجوئی ٹی ننے پین وخت اس انت کروئی ءِ۔ بروک آ دیوان اٹی گڈیکو حالیت اس مون آ بریک۔ داوخت آ قومی اسمبلی ٹی قائد حزب اختلاف سید خورشید احمد شاہ پارے کہ فوجی عدالت آتا بابت ہیت وگپ کن بنائی دیوان ئس، دا معاملہ غا حکومت نا پوزیشن مون آ بسنے، حکومتی نقطہ نظر نن تینا تینا پارٹی لیڈر شپ نا مون آ تخنہ، نن دیوان اٹی نیشنل ایکشن پلان ، آپریشن ضرب عضب و پارلیمانی سلامتی کمیٹی نا بابت ہیت کرینن۔
اوپارے کہ وزیر کانود زاہد حامد پارے کہ دا چرجوئی ٹی دُوارہ دیوان 17جنوری آ مریک۔ پی ٹی آئی نا راہشون مخدوم شاہ محمود قریشی پارے کہ اِراسال اکن ملٹری کورٹ اڈتننگاسس ، نن مشروط وڑاٹ اونا موکل تسوسن۔ شاہ محمود قریشی پارے کہ نن امنا کینہ کہ آپریشن ضرب عضب سرسہبی اٹ ہمکنار مسنے و داحالیت بھلو حد اسسکان گچین مسنے، نن دیوان اٹی پی ٹی آئی نا کنڈآن 6ٹک آتے تخانن ہرافتے ٹی فوجی عدالت آتیان بابت پورو بریفنگ، نیشنل ایکشن پلان نا نوعیت، انسداد دہشت گردی نا عدالت نا حالیت ، ملک اٹی جم امن و ایمنی نا حالیت آتیا بریفنگ و دابابت پورو حکومتی لائحہ عمل اسے آن بیدس پارلیمانی کمیٹی قومی سلامتی اوار ءِ۔
اوپارے کہ فوجی عدالت آتا بابت حکومتی نقطہ نظر ءِ پارٹی فورم آ شرہ ٹی اتسا صفاءُ ہیت اس مون آ بریک۔
