اسلام آباد(پاکستان نیوز پوائنٹ 05جنوری2016ء) چین پاکستان اقتصادی راہداری ڈٹ(سی پیک) نا پوروی آن ملک اٹی 100آن 150ارب ڈالر نا درملکی زرکاری مریک، ڈٹ انا رداٹ ملک انا کیہی علاقہ غاتیٹی خاص ءُ اقتصادی زون و انڈسٹریل اسٹیٹ اڈتننگک ہرافتے ٹی چین آن بیدس مچ آ دنیا نا زرکارآک زرکاری کیرہ و دا صنعت آتیٹی تیار کروک آ مصنوعات آتا مچ آ دنیا ٹی برآمد کننگک ہراڑآن پاکستان نا صنعتی و اقتصادی نشوونما ٹی کمک رسینگک۔
پنچ شنبے آ کمامدارآک اے پی پی ءِ پاریر کہ سی پیک نا رداٹ خاص انگا صنعتی زون تیٹی درملکی زرکارآتا صنعت آتا اڈتننگ کن 100 آن 150 ارب ڈالر نازرکاری کیرہ ہرافتے ٹی ٹیکسٹائل، لیدر، انجینئرنگ ، اسپورٹس گڈز اتون اوار ایلو کیہی بشخ آک اوار ءُ۔ اوپارے کہ پاک چین صنعتی کمکاری نا رداٹ صوبہ غاتا کنڈآن گچین 9زون تا اوار مننگ نا فیصلہ کرینے۔ دامسخت کن صوبہ غاک کیہی ہند آتا پیدواری ءِ کریسر ہرافتے آن خیبرپختونخوا نا کنڈآن رشکئی اکنامک زون ، سندھ انا کنڈآن چائنہ اکنامک زون، پنجاب نا کنڈآن چائنہ اکنامک زون شیخوپورہ ، گلگت بلتستان نا کنڈآن مہمند اس اکنامک زون وخت اس کہ کشمیر نا کنڈآن بھمبر صنعتی زون ءِ اوار کننگ نا سلاہ تننگانے۔
بنجائی دارالحکومت اسلام آباد اٹی آئی سی ٹی ماڈل انڈسٹریل زون و پورٹ قاسم اٹی پاکستان اسٹیل مل انا ڈغار آ انڈسٹریل پارک اس جوڑ کننگ وخت اس کہ فاٹا نا کنڈآن مہمند ماربل انڈسٹریل زون اس جوڑ کننگ نا سلاہ تس۔ اوپاریر کہ چین پاکستان اقتصادی راہداری نا ڈٹ آن نئے بیرہ پاکستان ءِ اقتصادی فائدہ دوئی مریک بلکن داڑآن ڈیہہ نا ایلو ملک آتا معاشی سرجزآتے ہم مون آ دننگ دوئی مریک و پاکستان و مچ آ دنیا نا ملک آتون اقتصادی رابطہ غاتیٹی ودکی مریک ہراڑآن ملک انا راجی و اقتصادی شونداری ٹی کمک رسینگک۔
اوپاریر کہ قراقرم ہائی وے ءِ گچین جوڑ کننگ تون ایم فور نیشنل موٹروے آ ہم چینی انجینئردے و نن کاریم اٹی اختہ ءُ ، ریل ویز و لائٹ ریلز نا اپ گریڈیشن ہم ہندا ڈٹ انا بشخ ءِ۔ اوپاریر کہ ڈٹ انا محور گوادر، ہراڑے سی پیک ڈٹ بحیرہ ہند اتون ملک، ہنداکان غٹ وسیلہ غاک پاکستان نا بنجاء و دیکی چین ءِ کارہ۔ وخت اس کہ پاکستان و چین اٹی تیار مروک آ مال مچ آ دنیا ٹی گدریفنگک۔
گوادراٹی فری ٹریڈزون، اسپیشل اکنامک زون، کوسٹل ہائی وے ہم پوروی نا مرحلہ غاتیٹی ءِ۔ اوپاریر کہ پاکستان نا چین اتون سیاسی تعلقداری اسٹریٹجک اکنامک تعلقداری ٹی بدل مسنے، دانا ننا شونداری و ڈیہہ نا آخبت آ مثبت زئم تمک۔ گوادرسی پیک نا گیٹ وے مریک ، دا ہندا صدی نا بھلو موقع ءِ دادے زیان کننگ کپنہ۔ ڈیہہ نا مسہ ارب الس داڑآن مستفید مریرہ۔
