اسلام آباد(پاکستان نیوز پوائنٹ 04جنوری2016ء) بنجائی وزیر نیشنل فوڈ سیکورٹی اینڈ ریسرچ سکندرحیات بوسن پارینے کہ بنجائی حکومت کشاری بشخ انا شونداری و گچینی کن گچین وڑاٹ کاریم کننگ ءِ و پیداواری خڑچءِ کم کننگ و کشت و کشار ءِ کٹیا کروک بشخ اس جوڑ کننگ کن چندی گام گیج کننگانے۔ بنجائی وزیر سکندر حیات خان بوسن چارشنبے آ داڑے اسہ بیان اسے ٹی پارے کہ 18می ترمیم آن پد کشت وکشار نا بشخ صوبہ غاتے گدریفنگانے ولے حکومت صوبہ بلوچستان تون اوار ایلو مر مر انگا علاقہ غاتیٹی چنکا بزغر تا شرحالی آ خصوصی چکار تخانے۔
اوپارے کہ صوبہ بلوچستان نا بزغر تا شرحالی و کشاری بشخ ءِ کٹیا کروک جوڑ کننگ کن اسہ ہزار چنکا بزغر تے تربیت تننگا۔ اوپارے کہ کشارگر آتے کن خصوصی سکل ڈویلپمنٹ پروگرام نا بناء کننگانے۔ اوپارے کہ صوبہ بلوچستان نا پین کشارگرتے تربیت نا فراوانی نا ڈٹ آ ہم سجفنگ انگ ءِ ہراڑآن نئے بیرہ پیداواری خڑچ کم مریک بلکن بزغرتا شرحالی ٹی ہم ودکی مریک ۔
او بزغرتیا زورشاغا کہ او کشاری بشخ انا شونداری کن صوبائی حکومت آتون اواری اٹ کاریم کیر۔ اوپارے کہ کشاری بشخ اکن دیر انا کاختی نا مون ءِ توننگ کن صوبہ بلوچستان اٹی سولر ٹیوب ویل خلنگک۔ اوپارے کہ داچرجوئی ٹی پاکستان کشاری پٹ وپولی کونسل (پی اے آرسی) صوبائی کشاری ادارہ غاتا کمک اٹ گام گیج کننگ ءِ ہرانا مثبت نتیجہ مون آ بننگءِ ۔ اوپارے کہ حکومت کشاری بشخ انا شونداری و پیداواری خڑچ ءِ کم کننگ کن پرعزم ءِ ۔
