مستونگ(پاکستان نیوز پوائنٹ 02جنوری2016ء) صوبائی وزیر محکمہ ایس اینڈ جی اے ڈی چیف آف بیرک نواب محمد خان شاہوانی پارینے کہ مردم شماری بلوچ قوم انا بقاء نا ویل ءِ۔ اوغان مہاجر آتا ساڑی گری ٹی مردم شماری صاف و شفاف مفک۔ صوبہ کیہی دہائی تیان مہمان نوازی نا حق ءِ ادا کرے داسہ وخت انا اہم گرج ءِ کہ اوغان مہاجر آتا پدی گدریفنگے۔ نیشنل پارٹی بلوچ قوم انا تشخیص آ ہچ ءُ آنچ اس بننگ کن ہلیپک۔
داخیال آتا درشانی ءِ او مستونگ اٹی جتا شخصیت ایماندارحاجی شفیع محمد باروزئی ، شہید عبدالمطلب ، شہید خادم حسین شاہوانی ، شہید کامران ، منان رند انا خاہوت آتون ہڑزخواہی نا درشان و فاتحہ خوانی کننگ آن پد صحافی تتون ہیت وگپ کرسا کرے۔ داوخت آ وڈیرہ سلطان دین محمد شاہوانی ، میر نذرجان شاہوانی، میر مجیب الرحمان ، نیشنل پارٹی نا سینئر نائب صدر ماسٹر محمد علی شاہوانی ، عطاء شاہوانی ، علی نواز ، نذیر بگٹی و ایلوفک ہم ساڑی ئسر۔
صوبائی وزیر نواب شاہوانی ”اے پی پی“ تون خصوصی وڑاٹ ہیت وگپ کرسا پارے کہ مہاجر آتا ساڑی گری ٹی بلوچستان اٹی مردم شماری بلوچ قوم ءِ اقلیت اٹی بدل کننگ نا اسہ سازش اسے۔ ہرادے بلوچ قوم ہچ ءُ دروشم اسے ٹی امنا کپک۔ داڑآن بھلا تشخص ءِ شدید خطرات لاحق مریک۔ اوپارے کہ مردم شماری آن مست اوغان مہاجر آتے باعزت وڑاٹ پدی گدریفنگے۔ قومی مفادات نیشنل پارٹی نا اولین اولیت آتیٹی اوار ءُ۔ درملکی تا ساڑی گری ٹی مردم شماری نا نتیجہ غاک قابل قبول مفسہ۔ اوپارے کہ نیشنل پارٹی نا سیاست نا محور الس نا خذمت ءِ۔ بلوچ الس نا مفاد آتیا ہچ ءُ سمجھوتہ اس کننگ کپنہ۔ ننا بقاء ہنداٹی ءِ کہ نن قومی مفادآتیا یکجا مرسا قومی فرض ءِ نبھائفن۔ (ع۔ن/س۔م۔ح)
