چشمہ(پاکستان نیوز پوائنٹ 28دسمبر2016ء) وزیراعظم محمد نواز شریف توانائی نا کاختی، دہشت گردی نا لعنت تون اوار ملک ءِ مون تروک غٹ چیلنج آتون گچین وڑاٹ مون تننگ نا عزم انا اعادہ ءِ کرسا پارینے کہ وطن عزیز آن لوڈشیڈنگ نا چٹفنگ ننا اولیت آتیٹی سرفہرست ءِ، مون تروک ویل آک اسٹ اسٹ مرسا ایسر مننگ ءُ، ملک مشکل آتیان پیش تمنگ ءِ، رہی سہی مشکلات و دہشت گردی ہم زوت چٹک، 2018ء اسکان نہ صرف ملک اٹی لوڈشیڈنگ مفک بلکن بجلی ہڑزان ہم دومریک، دھرنہ و برانز ملک اکن نسخان دہ ءِ ، نن سہی سمت آ روان اُن، دھرنہ و برانز آن ملکی شونداری ٹی اڑاند شاغنگپ، ملک آ رحم کننگے وخاص تینا سیاست نا خاطر ملک انا مفاد ءِ ِقربان کننگپ۔
اوداہیت ءِ چارشنبے آ داڑے 340 میگاواٹ نا چشمہ تھری نیو کلیئر پاور پلانٹ نا افتتاحی دود آن تران کرسا پارے۔ بنجائی وزیر دیر و بجلی خواجہ محمد آصف ، وزیر مملکت دیر و بجلی عابد شیرعلی ، وزیراعظم نا سلاہکار خارجہ امور سرتاج عزیز و پاکستان اٹامک انرجی کمیشن نا چیئرمین محمد نعیم ئسک ہم دود اٹی ساڑی ئسر۔ وزیراعظم پارے کہ نن ہراتم اقتدار اٹی بسن تو معیشت نا براحال ئس، توانائی نا کاختی ئس ، 18، 18 گھنٹہ نا لوڈشیڈنگ مسکہ و ملک دہشت گردی نا پلویڑ اٹی ئس ، اوپارے کہ نن قوم ءِ ویل آتیان کشنگ نا عزم انا درشانی ءِ کرین و داچرجوئی ٹی عملی گام گیج کرین۔
وزیراعظم پارے کہ قوم ءِ لوڈشیڈنگ آن نجات ترفنگ کن نن ہراسفر نا بناءِ کریسن اللہ نا شکر ءِ کہ او چرجوئی ٹی اینو اسہ پین سنگ میل اس عبور کننگانے۔ چشمہ تھری نیو کلیئر پاور پلانٹ نا پوروی و داڈٹ آن 340 میگاواٹ بجلی قومی گریڈ اٹی اوار مننگ آ مچ آ قوم ءِ مبارکباد پیش کیوہ۔ اوپارے کہ داڈٹ نیو کلیئر سائنس و ٹیکنالوجی نا پٹ اٹی پاک چین کمکاری نا شاہدی اسے، ہڑتوم آ ملک آتا نیام اٹ مثبت و جوڑجاڑی کمکاری و اشتراک و اخوت نہ صرف ہڑتوم آ ملک آتا مفاد اٹی ءِ بلکن ڈیہہ ٹی اسہ پوسکن ءُ دور اسے نا بناء ہم ارے۔
اوپارے کہ کنے اومیت ءِ کہ چشمہ فور نیو کلیئر پلانٹ ہم تخوک آ وخت آن مست یعنی 2017 ء نا نیمہ غان مست بجلی نا پیداوار نا بناءِ کیک۔ داکان بیدس کے ٹو و کے تھری پاور پلانٹ آتا جوڑ جاڑ آن ہراتوانائی نا دوئی نا کنڈآاسہ اہم ءُ گام اس مریک دا تین پہ تینی تعلقداری تے ہم پین سوگو کیک۔ وزیراعظم پارے کہ کنا خوشگوار یات آتیٹی داہیت ہم اوار ءِ کہ چینی ساختہ اول پاور پلانٹ چشمہ یونٹ ون نا جوڑ جاڑ نا معاہدہ ہم ننا اولیکو دور حکومت اٹی طے مسوسس و ہمو ہڑتوم آ ملک آتا نیام اٹ نیو کلیئر توانائی نا بشخ اٹی کمکاری نا بنداو فراوان کرے۔
اوپارے کہ ای بنگٹ کنے بھاز خوشی مس کہ چشمہ ٹی چلینگوک آ جوہری پاور پلانٹ چشمہ ون و ٹو ملک اٹی غٹ آن جوان پاور پلانٹ ءُ ہرا ملک ءِ ہڑزان دام 600 میگاواٹ بجلی فراوان کننگ ءُ۔ اوپارے کہ کنے داہیت انا ہم خوشی ءِ کہ کینپ ہرانا ڈیزائن لائف 2002ء ٹی پورو مسوسس اینو ہم رکھ وڑاٹ بجلی نا پیداوار ءِ برجاتخانے۔ اوپارے کہ جہانی کمک نا بیدس چار دہائی آن زیات وخت آ محیط کینپ نا پیداواری لائخی اسہ اہم ءُ سرسہبی اسے۔
دا ڈٹ آک قابل عمل نیو کلیئر پاور پروگرام نا بنداو ءِ تخانو۔ وزیراعظم پارے کہ چشمہ و مظفرگڑھ اٹی 1100 میگاواٹ نا پیداوار نا پین ڈٹ ہم جوڑ کننگانے، داہیت مچ آ قوم اکن خوشی نا ہیت اسے کہ پاکستان اٹامک انرجی کمیشن جوہری ایندھن اٹی خود انحصاری کن بھاز کاریم کرینے۔ ساڑی آحکومت توانائی نا بشخ اٹی ہر گرج ءِ پورو کیک اوداوخت آ چینی حکومت تون اواراوار چائنا نیشنل نیو کلیئر کارپوریشن ، ایگزم بینک و چینی کمپنی تا ہم منت واری ءِ ادا کرے ہراک دا ڈٹ اکن تکنیکی و مالی کمک فراوان کریر۔
وزیراعظم پارے کہ وطن عزیز آن لوڈشیڈنگ نا چٹفنگ ننا اولیت آتیٹی سرفہرست ءِ ، مسہ سال اٹی حکومت نا گام گیج آتیان حالیت آتیٹی بھاز جوانی بسنے ، نن پرعزم اُن، وحسب وعدہ 2018 ء اسکان بجلی نا لوڈشیڈنگ ءِ چٹفنگک ۔ اوپارے کہ ملک انا شونداری کن توانائی نا ڈٹ آتا بھلو اہمیت اسے، پاکستان اٹامک انرجی کمیشن نیو کلیئر پاور پلانٹ نا تنصیب آ کاریم ءِ ترند کے و ہدف آتیان زیات بجلی ودی کرسا ملک انا شونداری ٹی تینا کڑ دءِ ادا کے۔
وزیراعظم داوخت آ چینی کمپنی تے نیو کلیئر پاور پلانٹ آتا بشخ اٹی زرکاری نا سلہ خلک و باوری ترفے کہ حکومت پاکستان دا چرجوئی ٹی ہروڑنا کمکاری و مدد فراوان کیک۔ اوڈٹ انا افتتاح نا وخت داڑے کاریم کننگ و چین آن بروک آ مہمان تے بخیرٹ پارے و پارے کہ پاکستان و چین خڑکی سنگت ءُ و کیہی بشخ آتیٹی اواری اٹ کاریم کننگ ءُ۔ نن سی پیک اٹی ہم شریداراُن۔
اوپارے کہ سی پیک نا ڈٹ ننا اشتراک کار ءِ مست آن زیات سوگو جوڑ کیک، موٹرویز، ہائی ویز، گوادر نا بندرگاہ ، گوادر ایئر پورٹ ، پاکستان ریلوے ءِ اپ گریڈیشن کننگ تون اوار کیہی ڈٹ آتیا چین تون اواری اٹ کاریم کننگ اُن، ملک انا ہر چار آ صوبہ غاتیٹی توانائی نا ڈٹ آک زیر عمل ءُ، کیہی بشخ آتیٹی پاکستان و چین نا نیام اٹ کمکاری نا بھلو وارخواہی اس ساڑی ءِ و نن تین پہ تینی مفاد اٹی دا ڈٹ آتیا کاریم کننگ کینہ، چین اتون ننا سنگتی نا سوگو رشتہ ساڑی ءِ، ننا سنگتی این برادرز پاننگک و ہمالیہ آن بڑز، سمندرآن گہری و شہد آن زیات ہنین ءِ، وزیراعظم پارے کہ نن اقتدار اٹی بسن تو ملک ءِ دہشت گردی نا ویل مون تروک ئس، 18,18گھنٹہ نا لوڈشیڈنگ مسکہ، معیشت نا براحال ئس، اینو الحمداللہ اللہ اسٹ اسٹ کرسا غٹ ویل آک ایسر مننگ ءُ، دھرنہ و برانز نا گرج اف، دا ملک اکن نسخان دہ ءِ، اوپارے کہ 340 میگاواٹ نا سی فور ڈٹ 2017ء ءِ نیم اٹی پورومروئی ئس ولے اودے اپریل 2017ء اسکان پورو کننگ نا یخین ترفنگانے، داڑآ ای ڈٹ آ کاریم کروک آ زموار آتا منت واری ءِ ادا کیوہ و اوفتے مبارکبادی ایتیوہ۔
اوپارے کہ وسط مدت اٹی پی اے ای سی ءِ 8800 میگاواٹ جوہری توانائی ودی کننگ نا ہدف تننگانے و کمیشن دا ہدف ءِ پورو کیک۔ داکان مست وزیراعظم چشمہ تھری نیو کلیئر پاور پلانٹ نا دورہ ءِ کرے و دانا کیہی بشخ آتے ہرا، کنٹرول روم اٹی وزیراعظم ءِ پلانٹ منیجر ریاض خالق انصاری ڈٹ انا بارواٹی بریفنگ ہم تس، وزیراعظم ءِ پاننگاکہ دا پوسکن ءُ کنٹرول روم اسے، ڈٹ چائنا نیشنل نیو کلیئر کارپوریشن و پاکستان اٹامک انرجی کمیشن نا اسیجائی کمک اٹ پورو کننگانے ہرا ملک اٹی بجلی نا کاختی نا مون ءِ توننگ اٹی کمک ایتک۔
چشمہ ون و چشمہ ٹو پروجیکٹ انا سرسہب آپریشن آن پد دا مسٹ میکو ڈٹ ءِ۔ چشمہ فور نیو کلیئر پاورنا ڈٹ 2017ء ٹی پورو مریک وخت اس کہ کراچی نیو کلیئر پاور پروجیکٹ نا ۔2و کے۔3آن 2030اسکان قومی گریڈ اٹی 8800 میگاواٹ بجلی نا ودکی مریک ہرا پاکستان اٹامک انرجی کمیشن کن وسط مدتی ہدف ءِ۔ پاکستان نیو کلیئر ریگولیٹری اتھارٹی چشمہ تھری تون اوارغٹ نیو کلیئر پاور ڈٹ آتا منظوری ءِ تسنے ہرا انٹرنیشنل اٹامک انرجی ایجنسی معاہدہ غاتا جوہری معیار آتا وڑاٹ ءِ۔
چشمہ تھری پاور پلانٹ پاک چین اسیجائی کمکاری نا اسہ پین اہم ءُ مزل نا نشان اسے۔ داڑآن صنعتی و واپاری بشخ آتے توانائی نا فراوانی کن ذریعہ ملک انا جم اقتصادی شونداری ٹی کمک رسینگک۔ دود انا ایسری آ پاکستان اٹامک انرجی کمیشن نا چیئرمین محمد نعیم وزیراعظم ءِ سوینئر اس ہم پیش کرے۔
