اسلام آباد(پاکستان پوائنٹ نیوز۔25 جولائی۔2016) وزیراعظم نا سلاہکار قومی تاریخ و ادبی میراث عرفان صدیقی پارینے کہ علم و ادب نا مون آ دننگ آن قومی مزاج و مثبت رویہ غاتا جوڑ جاڑ وخت انا اہم گرج ءِ، راج و قوم انا حقی شون اکن اہل علم و ادب ءِ فکری محاذ آ یکجا مرسا کوشست کروئی مریک۔ او چیئرمین پی ٹی وی و پنی دانشور عطاء الحق قاسمی تون ہیت وگپ کریکہ ہرادوشنبے آقومی تاریخ و ادبی میراث ڈویژن اٹی اوڑتون اوڑدہی کرے۔
عرفان صدیقی پارے کہ اردو نا بطور سرکاری زبان نفاذ کن سخت کوشست جاری ءِ۔ اہل علم، زبان و ادب داقومی فرض انا پورو کننگ اٹی ننا دست و بازجوڑ مریر تانکہ قومی آڑزو و است خواہیک پورو مننگ کیر۔ اوپارے کہ قوم انا تہذیب و دودوربیدہ ہی روایت آتا مون آ دننگ اٹی پاکستان ٹیلی ویژن ہمیش بے کچ اہم کڑد ادا کرینے۔ ساڑی آ حالیت آتیٹی پی ٹی وی ءِ قومی جوڑ جاڑ و شون، نظریاتی تشخص، سیاسی سوگوی و جمہوری اقدار نا مون آ دننگ کن گچین حکمت عملی اس بایدے تینائی کننگے۔
چیئرمین پی ٹی وی عطاء الحق قاسمی پارے کہ احوالکار آک دادوراٹی بھاز زیات اہمیت دوئی کرینو۔ ننا کوشست ءِ کہ حکومت وضع کروک آ ضابطہ اخلاق نا پور وپابندی ءِ کرسا الس ءِ صاف ستھرا سیل و سوات، درست خبرو مثبت جاچ فراوان کیر۔ عطاء الحق قاسمی اردوزبان نا بابت کوشست آتے قومی است خواہی نا پوروی نا کنڈ اہم گام اس گوندسا پارے کہ پی ٹی وی دارداٹ اہم کڑدادا کننگ کیک۔
دا آئینی ، قومی و کانودی زمہ واری نا پوروی ٹی اسیجائی بنداو تیا کمکاری ءِ مون آ دننگ نا گرج ءِ۔ اوپارے کہ ہرقوم کن اونا قومی زبان عزت و شرف نا علامت مریک۔ ننے غٹ ءِ اسیجائی جوزہ غاتے کاریم اٹ ہتسا داقومی مسخت ءِ دوئی کروئی ءِ۔ داوخت آ سلاہکار وزیراعظم عرفان صدیقی عطاء الحق قاسمی ءِ گچین کاری 2013ء نا بابت نوشتہ کروک تینا کالم آتیا تالان کتاب”کالم کہانی “ ءِ ہم پیش کرے۔
