سانگلہ ہل(پاکستان نیوز پوائنٹ 11نومبر2016ء) وزیراعظم محمد نواز شریف پاکستان نا شون و الس نا شرحالی ءِ تینا اولین ایجنڈہ گوندسا پارینے کہ گڑاس بندغ شونداری ایجنڈہ ءِ توننگ خوارہ، او خلقت آک ہمیشہ ننا شونداری ڈٹ آتا مخالف ءِ کریر ولے او سرسہب متوس، دننگا خلقت آتا ایجنڈہ بے سہب و ننا سرسہب مریرہ، الس نواز شریف تون تفوک ءُ و او شونداری نا ایجنڈہ ءِ توروک آتون وخت اس ہم تفپسہ۔
او جمعہ آ داڑے فیصل آباد۔پنڈی بھٹیاں موٹروے آ سانگلہ ہل انٹرچینج نا افتتاحی دود انا وخت آ اسہ بھلو السی مچی سے آن تران کریکہ۔ داوخت آ اوسانگلہ ہل کن گیس انا فراوانی ، ننکانہ صاحب اٹی 250کٹ آتا ہسپتال اسے نا زوت بنداو ءِ تخنگ، فیصل آباد ساہیانوالہ ایکسپریس وے نا جوڑ جاڑ و قومی اسمبلی نا حلقہ این اے 103نا خلق ءِ سوئی گیس فراوان کننگ نا ہم پڑو ءِ کرے۔
داوخت آ بنجائی وزیر امور کشمیر و گلگت بلتستان برجیس طاہر ، وزیر مملکت سائرہ افضل تارڑ ، چیئرمین متروکہ وقف املاک بورڈ صدیق الفاروق، صوبائی پارلیمانی سیکرٹری راناارشد، باسک قومی اسمبلی عرفان ڈوگر، افضل تارڑ تون اوار علاقہ نا ایلو شخصیت آک ہم ساڑی ئسر۔ وزیراعظم محمدنواز شریف حکومت نا شونداری ڈٹ و الس نا جان جوڑی و تعلیم تون اوار کیہی آسراتی تا فراوانی نا ذکر ءِ کرسا پارے کہ او وخت بننگ والا ءِ کہ انشاء اللہ اُرا اُرا بجلی و گیس مریک، موٹرویک جوڑ مریرہ، غلہ غاتا پیداوار زیات و منڈی تسکان ترندی اٹ رسائی مریک ہراڑآن بزغر آتے ہر گڑانا نرخ جوان ملک۔
اوپارے کہ داسہ بجلی ہڑزان مریک، ہراتم بجلی ہڑزان مریک تو اونا براہ راست فائدہ پاکستان نا الس، کشار گر ، صنعت کار وورناتے مریک، اُراتیٹی چولاک لگرہ و شون و شونہالی اُراتیا دستک ایتک۔ وزیراعظم پارے کہ مسہ سال مست انا پاکستان ءِ ہبو و اینو پاکستان ءِ ہبو تو صفا ءُ پرخ اس نظر بریک، پاکستان آن بے روزگاری چٹک، ورناتے روزگار ملک، چنکا چنکا اُراتیٹی رہینگوک آتا اُراتیٹی شونہالی بریک، پاکستان آن نیزگاری و جہالت چٹک۔
اوپارے کہ داوڑنا گام ہی درحقیقت پاکستان نا شونداری ءِ ، داشونداری ءِ گڑاس بندغ آک توننگ خوارہ ولے او اوفک سرسہب متوس، داخلقت آک ہمیشہ ننا شونداری نا ڈٹ آتا مخالفت ءِ کریر ولے ننا ایجنڈہ اوفتے تورے، الس نواز شریف تون تفوک ءِ۔ اوپارے کہ بجلی و گیس انا ڈٹ آتیا کاریم جاری ءِ ، موٹروے و شاہراک جوڑ جاڑ مننگ ءُ، 2018ء اسکان مچ آ ملک اٹی بجلی نا لوڈشیڈنگ چٹک، دادے شونداری پارہ۔
وزیراعظم پارے کہ ہریفوئی مرے کہ او ہرابندغ آک ئسر ہرافک بجلی نا ویل آتے ودی کریر و اینو دیر شونداری نا کسر ءِ توننگ ءِ، داعنصرآک خوارہ کہ لوڈشیڈنگ ختم و بجلی ہڑزان مف ولے اوفک صفاکریر کہ دننگا خلقت آتا ایجنڈہ بے سہب و ننا سرسہب مریک سلک۔ وزیراعظم پارے کہ سی پیک آن پاکستان ناچشخ بدلینگ انگ ءِ، اقتصادی راہداری ڈٹ آن پوسکن آ دور انا بنامننگ ءِ۔
وزیراعظم محمد نواز شریف خیبرپختونخوا نا ذکر ءِ کرسا پارے کہ پوسکن آ پاکستان نا نعرہ ءِ خلوک آک داصوبہ ٹی ہچ ءُ کننگ اٹی افس۔ پوسکن ءُ پاکستان اس پین کسس آخا نن جوڑ کننگ اُن، ملک آن دہشت گردی ءِ نن چٹفینن، کراچی ٹی امن وایمنی نا گچینی ننا دوراٹی مس، دنیا پاکستا ن نا شون نا سفر نا اعتراف ءِ کیک۔ وزیراعظم محمد نواز شریف پارے کہ او 2013ء ٹی وعدہ کریسس کہ ہراتم ننا حکومت جوڑ مریک تو سانگلہ ہل انٹرچینج ءِ جوڑ جاڑ کینہ و اینو اللہ نا کرم اٹ انٹرچینج جوڑ مسنے، دابابت تینا وعدہ ءِ پورو کرینن، نن انت کہ وعدہ اس کینہ اودے پورو کینہ۔
اوپارے کہ سانگلہ نا الس نواز شریف تون مابت کیرہ و نواز شریف ہم سانگلہ ہل نا الس تون بھاز مابت کیک۔ محمد نواز شریف پارے کہ داانٹر چینج آن سانگلہ ہل آن لاہور نا سفر بھاز کم مریک، داسہ یکونیم گھنٹہ ٹی لاہور سرمرینہ، داکان مست دونیم گھنٹہ نا سفر ئس۔ اوپارے کہ سوئی گیس نا فراوانی نا ڈٹ اسہ بھاز بھلو ڈٹ اسے، بھاز زوت سانگلہ ہل نا ہر اُراٹی گیس بریک۔
اوپارے کہ سانگلہ ہل اٹی یونیورسٹی اس ہم جوڑ مریک۔ اوپارے کہ قوم غٹءِ چاہک کہ مسکوہی نا حکومت آک انت انت کریر و نن انت کننگ اُن، نن موٹروے جوڑ کرین، اولیکو وار لاہور آن موٹروے کراچی آ ہِننگ ءِ، ریلوے و پی آئی اے ہم گچین مسنے۔ اوپارے کہ سابقہ دور اٹی تو حاجی تا پیسہ غاتے ہم کُننگا سس، ننا دور اٹی اوفتا پیسہ غاتا بچت مس و بست و بند ہم جوان کننگا ہراڑآ حاجیک خوش ءُ۔
وزیراعظم پارے کہ ننا پروگرام ءِ کالج آتیٹی طالب علم آتے لیپ ٹاپ ایتن، ملک انا بھلا شارتیٹی 50گچین ہسپتال جوڑ کننگ انگ ءِ ، 12سال آن بند سانگلہ ہل ریلوے لین ءِ آپریشنل کننگ نا فیصلہ کننگا، غٹ تکنیکی ویل آتے ایسر کننگ آ توجوہ تسونن، داڑآ بھاز زوت کاریم نا بناءِ کننگک۔ اوپارے کہ ننکانہ صاحب اٹی 250کٹ آتا ہسپتال نا زوت بنداو ءِ تخنہ۔ وزیراعظم فیصل آباد ساہیانوالہ ایکسپریس وے نا جوڑ جاڑ نا پڑو ءِ کرسا پارے کہ فیصل آباد ساہیانوالہ ایکسپریس وے ءِ سانگلہ ہل اسکان ودیکی تننگک۔ اوقومی اسمبلی نا حلقہ این اے 103نا خلق ءِ سوئی گیس فراوان کننگ نا ہم پڑو ءِ کرے۔
