کوئٹہ (پاکستان پوائنٹ نیوز20دسمبر 2018ء) جمعیت علماء اسلام (ف) انا صوبائی جنرل سیکرٹری و اپوزیشن لیڈر ملک سکندر ایڈووکیٹ ، مسکوہی اسپیکر صوبائی اسمبلی سید مطیع اللہ آغاو حلقہ 26نا اومیتدار مولانا ولی محمد ترابی خورشید لیبرہال کوئٹہ غا برسا پاکستان ورکرز کنفیڈریشن بلوچستان (رجسٹرڈ) نا صدر محمد رمضان اچکزئی ، پاکستان ورکرز فیڈریشن بلوچستان (رجسٹرڈ) نا صدر حاجی عزیزاللہ کنفیڈریشن نا ایلو راہشون حاجی عبدالحئی ، عبدالباقی لہڑی ، محمد یار علیزئی ، سید آغا محمد، ملک محمد آصف ، محمد رفیق لہڑی، فضل محمد تون اوار ایلو عہدیدار و کارندہ غاتون اوڑدہی کریر۔
دااوڑدہی ٹی اوفک پاریر کہ مزور آتا کنڈا داوخت آ بننگ نا مسخت دادے کہ حلقہ نمبر 26اٹی ضمنی گچین کاریک مننگ ءُ ہراٹی جمعیت علماء اسلام (ف) انا کنڈآن مولانا ولی محمد ترابی اومیتدار ءِ ، ننا پارٹی نا مزور آتون ہر وخت رابطہ مریک انتئے کہ نن لس خلقت آن اُن و ننے مزور آتا ویل آتیان آگاہی ہم ارے۔ داکان گیشتر ہم نن لیبر ہال اٹی مزور آتون اوڑدہی کرینن، اوپارے کہ نن مزور آتے باوری ترفینہ کہ نن قومی اسمبلی، سینیٹ و صوبائی اسمبلی ٹی مزور آتا توار مرسا اوفتا مشکل آتے ایسر کینہ و ہراویل آتا ذکر ءِ کنفیڈریشن نا راہشون آک کرینو او ویل آتے تینا اولیت آتے ٹی اوار کینہ۔
اوباوری ترفے کہ الیکشن ءِ کٹنگ آن پد ہم مزور آتون پارٹی نا رابطہ برجاسلک۔ داوخت آ کنفیڈریشن نا راہشونک لیبر ہال آ بننگ آ ڈل ءِ بخیر اٹ پاریر و پاریر کہ مزور آتا درگہ غٹ سیاسی پارٹی تے کن ملوک ءِ و ننا است خواہی مریک کہ سیاسی پارٹیک مزور آتون کروک آ وعدہ غاتے پورو کیر۔ اوپاریر کہ گڑاس سیاسی پارٹی اینو نا دور اٹی ہم وونٹ تننگ کن پارہ ولے نما پارٹی لیبر ہال آ برسا مزور آتیان وونٹ خواہسا جوان ءُ گام گیج اسے نا پہل کرینو۔
