اسلام آباد(پاکستان پوائنٹ نیوز20دسمبر 2018ء) بنجائی وزیر تعلیم شفقت محمود پارینے کہ ملک اٹی خواندگی نا کچ ودنگ نا جاگہ غا کم مننگ ءِ ہراقومی شونداری نا کسر اٹی غٹ آن بھلا اڑاند ءِ، دا چیلنج تون مون تننگ کن جنگی بنداو تیا کاریم کننگ نا گرج ءِ، حکومت دا چرجوئی ٹی اسہ جامع ڈٹ اسے آ کاریم کننگ ءِ۔ اوداہیت ءِ جہانی اسلامی یونیورسٹی ٹی پاکستان و پاکستانیت نا سرحال آ اسہ سیمینار اسے آن تران کرسا پارے۔
سیمینار نا بست و بند ءِ جہانی یونیورسٹی و سنٹر فار گلوبل اینڈ سٹریٹجک سٹڈیز(سی جی ایس ایس) اسیجائی وڑاٹ کریسر۔ سیمینار آن جامعہ نا ریکٹر ڈاکٹر معصوم یاسین زئی، صدر ڈاکٹر احمد یوسف احمد الدرویش و (سی جی ایس ایس) نا چیئرمین لیفٹیننٹ جنرل (ر) ظہیر الاسلام آن بیدس ایلوفک ہم تران کریر۔ بنجائی وزیر تعلیم تینا تران اٹی پارے کہ نا انصافی پاکستانیت نا جوزہ ءِ نزور کیک ہرانا غٹ آن بھلا سوب دوہرا نظام تعلیم ءِ ہرانا سوب آن الس نا گیشتری شونداری نا وارخواہی تیان محروم مریرہ و اسہ چنکو تپہ اس قومی وسیلہ غاتیا کوزہ کرسا ناانصافی ءِ مون آ دیک ہرانا ہر کہول آ چٹفنگ وخت انا اہم انگا گرج ءِ۔
