اسلام آباد (پاکستان پوائنٹ نیوز20دسمبر 2018ء) پاکستان و اقوام متحدہ نا ادارہ خور و کشت و کشار نا نیام اٹ 5سالہ پوسکن آ کنٹری پروگرامنگ فریم ورک پک مس، فریم ورک انا رداٹ بین نا چٹفنگ، موسمیاتی بدلی تیان ہم آہنگ کشت وکشار و پیدوار ایکو سسٹم، و جم اٹنگا و کارگرکشت وکشار و خور انا نظام ءِ شونداری اولیت آتے ٹی اوار کننگانے۔ فریم ورک آ دستخط کننگ نا دود پنچ شنبے نادے اسلام آباد اٹی مس کنٹری پروگرامنگ فریم ورک آ(ایف اے او) نا مینا دولت شاہی و بنجائی وزیر غذائی رکھ و پٹ وپول صاحبزادہ محبوب سلطان دستخط کریر۔
داوخت آ بنجائی وزیر غذائی رکھ و پٹ وپول صاحبزادہ محبوب سلطان پارے کہ حکومت پاکستان اولیکو وار منہ کھر نا ناجوڑی نا چٹفنگ کن عملی گام گیج چست کننگ ءِ، منہ کھر ناجوڑی نا سوب آن سالانہ نسخان نا کچ کم و ود 69 کروڑ 20لکھ ڈالر آن زیات ءِ، ساہدار تے ٹی منہ کھر نا ناجوڑی نا چٹفنگ کن جہانی تنظیم خور وکشت وکشار تون اواری اٹ کاریم کننگ اُن۔ صاحبزادہ محبوب سلطان پارے کہ اقوام متحدہ نا ادارہ خور وکشت وکشار نا کمک اٹ 2022 ء اسکان دامہم ءِ باقاعدہ مچ آ ملک اٹ تالان کینہ۔
اوپارے کہ اقوام متحدہ نا تنظیم خور وکشت وکشار تون اواری اٹ دا مہم نا رداٹ ساہدار تے ٹی منہ کھر نا ناجوڑی نا تشخیص کن مچ آ ملک اٹی جوڑ کروک لیبارٹری تے پوسکن آ آسراتی تیان آراستہ کننگک۔ دود آن تران کرسا پاکستان اٹی ایف اے او نا نمائندہ مینا دولت شاہی پارے کہ دا مہم نا رداٹ پاکستان اٹی کشت وکشار و لائیو اسٹاک ءِ مون آ دننگ کن پاکستانی حکومت ءِ پورو کمک فراوان کینہ۔
اوپارے کہ پاکستان اسہ کشاری ءُ ملک اسے ہنداخاطرآن کشارگر آتا رکھ اکن ہروڑنا گام گیج کننگ نا گرج ءِ۔ داوخت آ سیکرٹری ڈاکٹر محمد ہاشم پوپلزئی پارے کہ دا ڈٹ سُو و اونا مصنوعات آتا ایکسپورٹ اٹی ودکی کن کمکار جوڑ مریک انتئے کہ دا ناجوڑی ساہدار تا تپاخت کننگ نا سوب جوڑ مفک بلکن ننا بزغر تا معاشی مرک انا سوب جوڑ مریک۔ دا ناجوڑی ناتدارک کن 5بشخ آتے ٹی کاریم کینہ۔ اوپارے کہ منہ کھر نا ناجوڑی نا پورو مون ءِ تورنہ۔
