اسلام آباد (پاکستان پوائنٹ نیوز20دسمبر 2018ء) چیئرمین اسلامی نظریاتی کونسل ڈاکٹر قبلہ ایاز پارینے کہ ریاست مدینہ نا خدوخال نا جاچ ءِ ہلنگ کن 25باسکی کمیٹی اس ٹہیفنگانے، پوسکن آ نکاح نامہ فارم کونسل نا بروک آ دیوان اٹی پیش کننگک، نجی سود بل آ کاریم پورو مننگ آن پد تعلقدار وزارت ءِ گدریفنگک۔ اے پی پی تون ہیت وگپ کرسا قبلہ ایاز پارے کہ بنجائی حکومت نا کنڈآن ننے پاننگانے کہ اسلامی نظریاتی کونسل ریاست مدینہ نا خدوخال ءِ تیار کننگ اٹ ننتون کمک کبو۔
اوپارے کہ دابابت 25باسکی کمیٹی اس ٹہیفنگانے ہراٹی چاہندار و عالم دین آتے اوار کننگانے، داکان بیدس ریاست مدینہ نا خدوخال نا سرجم جاچءِ ہلنگ کن کونسل نا شعبہ تحقیقات ءِ زمواری تننگانے ہراداڑآ کاریم کننگ ءِ۔ اوپارے کہ دامسخت کن بروک آتُو گول میز کانفرنس اس ہم اڈ ترفینہ، ہراٹی شریک عالم دین ، مشائخ و ایلو کانودی چاہندارآتیان معاشی، راجی ، تنظیمی ، شرحالی و ایلو معاملہ غاتیا سلابت کننگک۔
اوپارے کہ حکومتی وزیر آتا کنڈآن ننے پاننگانے کہ ریاست مدینہ ءِ تینا کننگ کن سود ءِ شیف خلنگ بنداوی جزومریک۔ اوپارے کہ سی پیک ڈٹ آتے ٹی چین ہم آمادگی ظاہر کرینے کہ او اسلامی بینکنگ نا کمک اٹ زرکاری کننگ کن تیار ءِ انتئے کہ اسلامی بینکاری ٹی داوخت آ برطانیہ، فرانس ، امریکہ ، سوئٹزر لینڈ تون اوار ایلو ملک آتے ٹی آزموندہ غاتے کننگ انگ ءِ ۔
قبلہ ایاز پارے کہ ” مسہ طلاق قابل تعزیر ڈوہ“ نا مسودہ غا عالم دین تا نیام اٹ داسکان اختلاف ارے ، داسہ فیصلہ دا مسنے کہ پوسکن آ نکاح نامہ فارم اس تیار کننگے ہرانا مسودہ غا ننا پٹ وپولی بشخ کاریم کننگ ءِ۔ اومیت ءِ کہ جنوری نا آخیر اسکان نکاح نامہ ءِ تیار کننگک انتئے کہ متکن آ نکاح نامہ ٹی گڑاس شق ہند ن ءُ ارے ہرافتے نکاح خوانوک آ تینٹ کاٹ کیک۔
اوپارے کہ داسہ وخت انا گرج ءِ کہ نکاح نامہ ٹی پوسکن ءُ وڑوڈول اتنگے۔ اوپارے کہ نجی سود انا بل آ کاریم ءِ پورو کننگ آن پد پدی تعلقدار وزارت آ گدریفنگانے۔ دا بل جماعت اسلامی نا امیر سراج الحق نا کنڈآن پیش کننگاسس۔ اوپارے کہ کنا احوال آتا رداٹ سینیٹ نا قائمہ کمیٹی کانود و انصاف دا بل انا منظوری ءِ تسنے ہرادے زوت اسمبلی ٹی پیش کننگک۔ اوپارے کہ نجی سود انا کاروبار بلوچستان اٹی بھاز زیات ودانے ہرا بے کچ گڑتی اسے، ہموڑے بھلو کچ اسے آ خلقت نجی سود نا کاروبار ءِ کننگ ءِ اونا چٹفنگ کن بایدے کانودسازی اس مرے۔
