لاہور (پاکستان پوائنٹ نیوز20دسمبر 2018ء) صدر مملکت ڈاکٹر عارف علوی پارینے کہ ننے تینا بہادر سلہہ بند فوج آ فخر ءِ، پاک بحریہ دنیا ءِ کلہو تس کہ نن تینا دیر تا جوانی اٹ رکھ ءِ کننگ کینہ، گوادر بندرگاہ نا کمک اٹ واپار بناکننگ ءِ ، قومک تینا عزم اٹ شون ہلیرہ، پوسکن آ پاکستان کن بھاز پراومیت اُن۔ اوداہیت ءِ داڑے پنچ شنبے نا دے آ میری ٹائم سیکورٹی ورکشاپ نا ایسری دود آن تران کرسا پارے۔
صدر پارے کہ پاک بحریہ نا کنڈآن نیشنل میری ٹائم سیکورٹی ورکشاپ نا بست و بند اسہ جوان ءُ و بروخت گام گیج اسے۔ اواومیت ظاہر کرے کہ دا ورکشاپ نئے بیرہ سمندری معاملہ غاتا بارواٹی بلکن قومی اقتصادی شونداری و جہانی بحری امن اٹی ہم پاک بحریہ نا کڑد ءِ تالان کیک۔ اوداہیت آ زور شاغا کہ پاک بحریہ نا گرج آتے پورو کننگ کن پین بحری جہاز بایدے جوڑ کروئی مرے۔
اوپارے کہ پاکستان نیوی نا انجینئرآک لائخ ءُ۔ صدر مملکت ڈاکٹر عارف علوی کراچی نا کرک آ چاگڑدی کچٹی نا ویل انا ذکر ءِ کرسا پارے کہ چاگڑدی کچٹی نا سوب آن سمندری حیات آتے ہم خطرہ ءِ وخت اس کہ کراچی ٹی کنوئی آ دیر انا سنگین ویل ہم مون تروک ءِ۔ اوپارے کہ پاکستان نا کرک آتیا مینگروز (خلوک آ جنگل آک) ہم کم مننگ ءُ۔ اوپارے کہ ننے کرک و سمندری کچٹی نا جوان احساس ارے۔
صدر داہیت انا گرج آ زور شاغا کہ ماہی گیری نا بشخ انا شونداری کن گام گیج کروئی مریک و داڑتون اوار اوار سمندری حیات نا بقاء کن کوشست آتے اتوئی مریک۔ صدر ڈاکٹر عارف علوی پارے کہ پاکستان اٹی سیل و سوات نا بے پناہ وارخواہی ارے ہرافتیان فائدہ ہرفنگ نا گرج ءِ ، ملک اٹی سیل و سوات ءِ مون آ دننگ آن معیشت ءِ سوگوی ملک۔ صدر پارے کہ او پوسکن آ پاکستان کن بھاز پر اومیت ءِ قومک تینا عزم اٹ شون ہلیرہ ۔ اوپارے کہ ایمان، سیوت و سخا نا اصول آتیا چلینگسا پاکستان ءِ مون آ دروئی ءِ۔ دود اٹی پاک بحریہ نا سروک ظفر محمود عباسی و پاک بحریہ نا سینئر آفیسر آک ہم ساڑی ئسر۔
