کوئٹہ (پاکستان پوائنٹ نیوز19دسمبر 2018ء) گورنر بلوچستان جسٹس (ر) امان اللہ خان یاسین زئی پارینے کہ ساڑی دور انا گرج آتارداٹ نصاب اٹی بدلی و ورناتے تکنیکی تربیت تننگ انگ ءِ ، تعلیم آن بیدس ہچ ءُ قوم اس شونداری نا مزل آتے طے کننگ کپک، داسہ وخت بسنے کہ بلوچستان اٹی تعلیم نا بشخ آ خصوصی چکار کننگک تانکہ بلوچستان نا ورناتے تینا لائخی تے کاریم اٹ اتنگ کن جہد کروئی مریک۔
داخیال آتا درشانی ءِ او چارشنبے نادے آ پرائم منسٹر یوتھ اسکل پروگرام نا رداٹ تکنیکی تربیت ہلوک آ مار و مسن تا کوئٹہ ٹی صوبائی کہول آ مقابلہ کرفنگ نا دود آن تران کرسا کرے۔ گورنر بلوچستان جسٹس (ر) امان اللہ یاسین زئی پارے کہ فنی مہارت نا مقابلہ غاتا اڈتننگ آن تربیت یافتہ صنعت کار آتا نظر اٹی بننگ کینہ ہراڑآن بے روزگاری نا کچ اٹی کمتی بریک۔
گورنر بلوچستان پارے کہ بلوچستان اٹی ٹیلنٹ نا ہچ ءُ کمتی اس اف ولے اگہ صوبہ نا طالب علم آتے وارخواہی دوبرے تو او جوان وڑاٹ صوبہ نا پن ءِ روشن کننگ کیرہ ، داڑکن المی ءِ کہ لمہ و باوہ ہم چناتے فنی تربیت آ چکار کروئی مریک تانکہ آخبت اٹی سی پیک ڈٹ آن زیات آن زیات فنی تعلیم نا سوب فائدہ ہرفنگ کیر، دود آن تران اٹی ڈائریکٹر جنرل نیوٹیک محمد مسعود احمد پارے کہ پاکستان مچ آ دنیا ٹی داخاطران منفرد ءِ انتئے کہ داڑے آبادی 60 درسد ورناتیا تالان ءِ۔ آخبت خڑک اٹی ڈٹ آتے ٹی کسب کار بندغ آتے بھلو کچ اسے ٹی روزگار دوبریک۔ دود اٹی صوبہ نا ہشت ضلع غاتا ورنامسن و مارک بشخ ہلکر۔ گچین سرسہبی دوئی کروک آ ورناتے ٹی گورنر بلوچستان جسٹس (ر) امان اللہ یاسین زئی انعام و سند بشخ وپانٹ کرے۔
