مستین نا حکومت آتا بے پرواہی نا سوب آن اینو پاکستان راجی و معاشی مشکل آتا گواچی ءِ، ساڑی حکومت نا ساڑی آ کوشست آتیان پیشن نا زرکاری و پنی آ درملکی کمپنیک پاکستان اٹی زرکاری کننگ ءُوزیراعظم عمران خان نا بہاولپور ڈویژن آن تعلق تخوک آ قومی اسمبلی نا باسک آتون ہیت وگپ

مستین نا حکومت آتا بے پرواہی نا سوب آن اینو پاکستان راجی و معاشی مشکل آتا گواچی ءِ، ساڑی حکومت نا ساڑی آ کوشست آتیان پیشن نا زرکاری و پنی آ درملکی کمپنیک پاکستان اٹی زرکاری کننگ ءُوزیراعظم عمران خان نا بہاولپور ڈویژن آن تعلق تخوک آ قومی اسمبلی نا باسک آتون ہیت وگپ

اسلام آباد (پاکستان پوائنٹ نیوز19دسمبر 2018ء) وزیراعظم عمران خان پارینے کہ مستین نا حکومت آتا بے پرواہی نا سوب آن اینو پاکستان راجی و معاشی مشکل آتا گواچی ءِ، ساڑی حکومت نا ساڑی آ کوشست آتیان پیشن نا زرکارآک و پنی آ درملکی کمپنیک پاکستان اٹی زرکاری کننگ ءُ، بروک آ وخت راجی وڑاٹ شونہال و معاشی وڑاٹ سوگو پاکستان نا وخت ءِ۔ اوداہیت ءِ بہاولپور ڈویژن آن تعلق تخوک آ قومی اسمبلی نا باسک آتون ہیت وگپ کرسا پارے ہراک چارشنبے نادے آ وزیراعظم آفس اٹی اوڑتون اوڑدہی کریر۔

اوڑدہی ٹی وزیراعظم نا خصوصی کمکار سیاسی امور نعیم الحق و قومی اسمبلی ٹی چیف وہپ ملک محمد عامر ڈوگرئسک ہم ساڑی ئسر۔ قومی اسمبلی نا باسک آک وزیراعظم نا سویلی پنجاب اٹی خصوصی است خواہی آ منت واری ءِ ہرفیر۔ باسک آک وزیراعظم ءِ تینا حلقہ غاتے ٹی السی ویل، شونداری ڈٹ، بزغر آتے مون تروک ویل ، تعلیم و جان جوڑی نا حالیت، دیر انا ویل و ورناتے کن روزگار نا فراوانی نا بابت معلومدار کریر۔

وزیراعظم پارے کہ مستین اٹی گورننس نا بے سہبی، میرٹ نا گوجالنگ و وسیلہ غاتے غیر منصفانہ بشخ وپانٹ نا سوب آن سویلی پنجاب پسماندگی نا گواچی مس۔ وزیراعظم پارے کہ ساڑی حکومت سویلی پنجاب نا محرومی تے چٹفک۔ بزغر آتا حق انا رکھ ءِ کننگک، تعلیم و جان جوڑی نا آسراتی تے المی جوڑ کننگک۔ ورناتے کسب کار جوڑ کننگ تون اوار اوار روزگار نا فراوانی ءِ ممکن جوڑ کننگک و مچ آ صوبہ ٹی شونداری و شونہالی نا اسہ پوسکنءُ دوراس بناکیک۔

وزیراعظم سویلی پنجاب اٹی دیر انا ویل، خاص وڑاٹ الس ءِ کنوئی ءُ سفا دیر انا فراوانی نا بابت بنجائی و صوبائی حکومت نا گام گیج آتیان معلومدار کرے۔ وزیراعظم پارے کہ باسک آک تینا حلقہ غاتے ٹی لس بندغ تون مدام رابطہ ٹی مریر تانکہ اوفتا ویل آک دمدستی وڑاٹ ایسر مننگ کیر۔ قومی اسمبلی نا باسک آک وزیراعظم نا کنڈآن ڈویژنل کہول آ اسمبلی نا باسک آتا کمیٹی اسے نا ٹہیفنگ نا خیرمقدم ءِ کرے۔

کمیٹی ضلعی کہول آ ہندی ویل آتا ایسری ہندی سرکڑدہ غاتا سلابت و الس نا است خواہی تا رداٹ صوبائی حکومت نا چاروکی ٹی المی جوڑ کیک۔ وزیراعظم پارے کہ حکومت شیفکو کہول آ الس ءِ بااختیار جوڑکننگ کن پرعزم ءِ۔ وزیراعظم پارے کہ مستین نا حکومت آتا بے پرواہی نا سوب آن اینو پاکستان راجی و معاشی مشکل آتا گواچی ءِ۔ ساڑی حکومت نا ساڑی آ کوشست آتیان اینو پیشن نا زرکارآک و پنی آ درملکی کمپنیک پاکستان اٹی زرکاری کننگ ءُ۔ انشاء اللہ بروک آ وخت راجی وڑاٹ شونہال و معاشی وڑاٹ سوگو پاکستان نا وخت ءِ۔ اوڑدہی کروک آ قومی اسمبلی نا باسک آتے ٹی محمد عبدالغفار وٹو، محمد فاروق اعظم خان، مخدوم سید سمیع الحسن گیلانی ، سید مبین احمد و چوہدری محمد اقبال ئسک اوار ئسر۔