اسلام آباد (پاکستان پوائنٹ نیوز19دسمبر 2018ء) آل پاکستان ٹیکسٹائل ملز ایسوسی ایشن (اپٹما) کرپاس نا پیدوار ءِ اسہ کروڑ 50 لکھ گانٹھ اسکان ودفنگ کن وزیراعظم نا کوشست آتا ستاءِ کرینے۔ اسہ بیان اسے ٹی اپٹمانا چیئرمین سید علی احسن پارے کہ بروک آ سال اسکان کرپاس نا پیدوار اسہ کروڑ 50 لکھ گانٹھ اسکان دننگ نا وزیراعظم نا عزم ستاکڑزنگ نا قابل ءِ۔
اوپارے کہ ٹیکسٹائل مصنوعات آتا تیاری کن بھلا خام مال نا حیثیت تخک و برآمد آتے ٹی دانا بنداوی ءُ بشخ اسے۔ اوپارے کہ بدقسمتی اٹ کرپاس نا پیدوار اٹی گدرینگوک آ منہ وخت اٹی کمتی مسنے و دانا دسنگ نا رقبہ ہم 17 درسد اسکان کم مسنے۔ اوپارے کہ داسوب آن ٹیکسٹائل انڈسٹری ءِ کرپاس نا درآمد آن بیدس ہچ ءُ چارہ اس اف۔ ملک اٹی کرپاس نا پیدوار اٹی کمتی نا سوب آن ہی گدرینگوک آسال اسہ ارب 22کروڑ ڈالر مالیت نا کرپاس نا 35لکھ 90 ہزار گانٹھ برآمد کننگا۔ اوپارے کہ کشارگرآتے زیات آن زیات آسراتی و آب اٹو بیج تننگ تون اوار اوار پوسکن آ ٹیکنالوجی آ بایدے چکار کروئی مرے تانکہ کرپاس نا پیدوار اٹی ودکی مننگ کے۔
