حسن ابدال (پاکستان پوائنٹ نیوز19دسمبر 2018ء) صدر مملکت ڈاکٹر عارف علوی پارینے کہ تعلیم ءِ مون آ دننگ راج انا غٹ تپہ غاتا زمواری ءِ، حکومت تعلیم ءِ مون آ دننگ کن کوشست کننگ اٹی ءِ، ورناک تینا پبی لائخی تیان ملک ءِ شونداری نا کسر آ روان کننگ کن گچین کڑد ادا کیر تانکہ جہانی برادری ٹی عظمت رفتہ بحال مرے۔ اوداہیت ءِ چارشنبے نادے آ داڑے کیڈٹ کالج حسن ابدال اٹی سالانہ دود آن تران کرسا پارے۔
صدر مملکت کالج اٹی طالب علم آتے تروک آ آسراتی و تعلیم نا آب آ خوشی نا درشانی ءِ کرسا پارے کہ جوان انگا راج تے ٹی چناتا تعلیم و تربیت اہمیت تخک، مستین اٹی تعلیم اسہ مشن اسے نا حیثیت تخاکہ۔ اوداہیت آ زور شاغا کہ آب اٹنگا تعلیم ءِ مون آ دننگ کن راج انا غٹ تپہ غاک تینا زمواری تے پورو کرسا گچین کڑد ادا کیر۔ صدر مملکت پارے کہ ایمان، سیوت و تنظیم بحیثیت قوم ننکن سرسہبی نا روشناءُ بشخ اسے ہرا ڑآ عمل کرسا مون آ ہِننگ مریک۔
اوخاص کر طالب علم آتے پنت و شون کرے کہ او خواری نا کمک اٹ غٹ بشخ آتے ٹی مون آ کارو ملک انا پن ءِ روشن کیر۔ صدر مملکت داہیت آ ہم زور شاغا کہ لمہ و باوہ و استاد آک آب اٹنگا تعلیم تون اوار اوار اخلاقی تربیت ءِ مون آ تخسا چناتے صبر و سگ و افہام و تفہیم نا تربیت ہم ایتر، پاکستان اٹی ورناتیا بھاز بھلو آبادی اس تالان ءِ ، ہرا ملک انا نہادی میرات ءُ۔
صدر پارے کہ ورناک تینا لائخی تے جوان وڑاٹ کاریم اٹ اتسا ملک انا شونداری ٹی کڑد ادا کیر و تینا خواری نا کمک اٹ ملک ءِ شونداری نا بڑزکو مزل آتیان ہمکنار کرسا جہانی برادری ٹی عظمت رفتہ ءِ بحال کیر۔ اوزالبول آتا حق آ زور شاغسا داعزم انا درشانیءِ کرے کہ نبی کریم زالبول آتے ہرا حق ءِ تس اوفتے المی جوڑ کینہ، وراثت اٹی زالبول آتے حق ترسا بریبر نا شاری جوڑ کننگ مریک۔
