کوئٹہ (پاکستان پوائنٹ نیوز18دسمبر 2018ء) صوبائی اسمبلی نا باسک اختر حسین لانگو و احمد نواز بلوچ پارینو کہ پرائیویٹ تعلیمی ادارہ غاک صوبہ ٹی تعلیم ءِ مون آ دننگ کن پبی گام گیج چست کننگ ءُ حکومت ءِ بایدے مرے کہ او دارارقم اسکول کون آ تعلیمی ادارہ غاتا پبی سرپرستی و اوفتے آسراتی فراوان کے تانکہ دا تعلیمی ادارہ غاک بروک آ چیلنج آتون مون تننگ کن ورنا چین ءِ تعلیم نا زیور آن آراستہ کننگ کیر۔
داہیت ءِ اوفک نوری نصیر کلچرل سینٹر اٹی دارارقم اسکول نا سالانہ انعام آتا بشخ وپانٹ نا دود آن تران کرسا کریر۔ دود آن کمشنر سوشل سیکورٹی سعید احمد سرپرہ، ڈائریکٹر دارارقم اسکولز ٹکری شفقت لانگو و زاہد اختر بلوچ ئسک ہم تران کریر اسمبلی نا باسک آک پاریر کہ ننے بروک آ دے تیٹی بھاز انگا چیلنج آتون مون تروئی ءِ ، ہراڑکن ننے خوانوک و کسب کار چناتا بھاز زیات گرج ءِ لمہ و باوہ غاتے بایدے مرے کہ او تینا چناتے تعلیم کون آ زیور آن آراستہ ضرور کیر انتئے کہ ہندا چناتے آخبت اٹی ملک و بلوچستان نا باگ دوڑ ءِ سنبھالوئی ءِ۔
اوفک پاریر کہ بلوچستان اٹی تعلیمی ءِ مون آ دننگ کن پرائیویٹ تعلیمی ادارہ غاک پبی کڑد ادا کننگ ءُ ہراڑآن نہ من مننگ مفک حکومت ءِ بایدے مرے کہ او دار ارقم کون آ اسکول آتا سرپرستی ءِ کے تانکہ او ورناتے تعلیم نا زیور آن آراستہ کرسا بروک آ چیلنج آتا مقابلہ ءِ کننگ کن پبی وڑاٹ تیار کننگ کے۔ اوفک پاریر کہ نن دابنگن ننے بھاز خوشی مس کہ دارارقم اسکول عصری تعلیم تون اوار اوار چناتے دینی تعلیم ہم تننگ ءِ و کوئٹہ ٹی دا اسکول نا کنڈآن اولیکو طالب علم قرآن پاک ءِ حفظ کرینے ہراڑآ اسکول انتظامیہ و اونا استاد آک مبارکباد نا حقدار ءُ۔
اوفک پاریر کہ ہراتم اسکان نن تینا چناتے تعلیم نا زیور آن آراستہ کپنہ ملک شون ہلنگ کپک اگہ ننے تینا چناتے تعلیم نا زیورآن آراستہ کروئی ءِ تو ننے دارارقم کون آ ادارہ غاتون پبی کمک کروئی مریک۔ اوفک پاریر کہ بلوچستان نیشنل پارٹی نا مدام کوشست مسنے کہ چناتے زیات آن زیات اسکول آتے ٹی داخل کرفے تانکہ او تعلیم حاصل کرسا ملک انا شونداری ٹی تینا کڑد ءِ ادا کننگ کیر اوفک بی این پی نا کنڈآن اسکول انتظامیہ ءِ ہروڑنا کمکاری نا باوری ترفیر۔
دودآن ٹکری شفقت لانگو و زاہد اختر بلوچ ئسک تران کرسا پاریر کہ راج اٹی داوخت آ نمبر گیم چلینگ انگ ءِ و ہراچنا نا زیات نمبر مریرہ لمہ و باوہ ہمو دے ہی سرسہب سرپند کیرہ چائے عملی زند اٹ او ہنسا بے سہب ہی انتئے مف اوفک پاریر کہ دارارقم نا مسخت ایلو راج آن جتا ءِ انتئے کہ ساڑی آ تعلیم نا نظام اٹی چناس راست آ سرحال اس نوشتہ کننگ کیک لمہ و باوہ نا شرف آ تو بھاز جوان ءُ سرحال اس نوشتہ کیک ولے عملا چناٹی ہچ ءُ بدلی اس بفک ولے دارارقم اٹی خوانوک آ چنانئے بیرہ اسہ گچین ءُ سرحال اس نوشتہ کننگ نا قابل مریک بلکن عملا لمہ و باوہ نا شرف ءِ کروک وراست پاروک اُس مریک ۔
اوفک پاریر کہ دارارقم نا تغ ءِ کہ ہر چنا سرسہب مرے چائے گوازی نا پڑ مرے یا سائنس و ٹیکنالوجی نا پڑچائے سیاست نا پڑ مرے یا بزنس مین نا دارارقم نا چناہی لیڈ کیک دارارقم چناتا لائخی تا رداٹ اوفتا تربیت و کڑد سازی ءِ کیک۔ اوفک پاریر کہ چناتا تربیت و سرسہبی کن لمہ وباوہ ءِ ہم بدل مروئی تمک و رول ماڈل اس جوڑ مروئی تمک۔ اوفک پاریر کہ ساڑی آ تعلیم نا نظام اٹی اسہ گچین ءُ اسکول سسٹم اسے نا گرج ئس ہراچناتے نئے بیرہ دنیا بلکن آخرت اٹی ہم سرسہبی ناذریعہ جوڑ کننگ نا زینہ مرے تو داکمتی ءِ دارارقم پورو کرے دارارقم داوخت آ لمہ و باوہ غاتا اومیت آتیا پورو سلنگ نا کوشست کننگ ءِ دود انا ایسری آ صوبائی اسمبلی نا باسک اختر حسین لانگو ، احمد نواز بلوچ ، کمشنر سوشل سیکورٹی سعید احمد سرپرہ ، سہیل راجپوت ایڈووکیٹ و ایلوفک پوزیشن ہلوک آ طالب علم و استاد آتے ٹی شیلڈ بشخ وپانٹ کریر و قرآن پاک ءِ حفظ کروک آ طالب علم نادستار بندی ءِ کننگا۔
