وزیر مملکت موسمیاتی بدلی زرتاج گل نا ماحولیات نا بابت اڈ ہلوک آ ورکشاپ نا بنائی دود آن تران

وزیر مملکت موسمیاتی بدلی زرتاج گل نا ماحولیات نا بابت اڈ ہلوک آ ورکشاپ نا بنائی دود آن تران

اسلام آباد (پاکستان پوائنٹ نیوز18دسمبر 2018ء) وزیر مملکت موسمیاتی بدلی زرتاج گل پارینے کہ دیر انا کاختی چیلنج آتا پیش خیمہ جوڑ مننگ کیک ، ملک اٹی ڈغار نا تہہ ٹی دیر انا کاریم اٹ اتنگ و بچت نا بابت زموارانہ رویہ غاتے مون آ دروئی مریک، حکومت ماحولیات نا بشخ انا شونداری و قدرتی وسیلہ غاتا رکھ اکن سنجیدہ گام گیج کننگ ءِ ، داسہ نن عملی وڑ اٹ تینا ملک و اونا وسیلہ غاتے رکھوک جوڑ کروئی ءِ۔

اودوشنبے نادے داڑے ماحولیات و صفائی و ستھرائی نا بشخ اٹی پائیدار شونداری ہدف آتیا عملدرآمد نا بابت اڈہلوک آ ورکشاپ نا بنائی دود آن تران کریکہ ۔ اوپارے کہ پاکستان اٹی ڈغار نا تہہ ٹی دیر انا دوئی نا ریگولیشن نا ہچ ءُ وڑوڈول اس اف ہرانا سوب ڈغار نا تہہ ٹی دیر انا کچ پدریسہ کم مننگ ءِ، داویل انا مون ءِ توننگ کن ملک اٹی اولیکو وار واٹر ٹیبل ریگولیٹری اتھارٹی اس جوڑکننگ انگ ءِ۔

وزیر مملکت پارے کہ دیر بے کچ کاریم اٹ اتنگ انگ ءِ ، خلقت اٹی دانعمت نا کاریم اٹ اتنگ و بچت نا اہمیت نا بارواٹی ہچ ءُ ادراک اس اف۔ اوپارے کہ دیر انا کاختی آن سنگین ویل آک ودی مریرہ، بلوچستان و سندھ اٹی خشک سالی آن ودی مروک آ حالیت آک ننا مون آٹی ءُ۔ وزیر مملکت پارے کہ ننے دیر انا کاریم اٹ اتنگ ءِ ریگولیٹ کروئی ءِ۔ ننے صاف دیر اتون صفائی ءِ ہم تینا کروئی مریک۔

اوپارے کہ ننا حکومت میٹرو و روڈ آتا جاگہ غا انسان تیا وسیلہ غاتے خڑچ کننگ ءِ اولیت ایتک۔ ملک اٹی کلین گرین پروگرام درستی راستی کرفنگانے ، داپروگرام نا رداٹ صاف دیر انا فراوانی ءِ المی جوڑ کننگ مریک وخت اس کہ صفائی ستھرائی و دیر انا نکاسی نا نظامءِ ہم گچین جوڑ کننگک۔ دود اٹی وزارت موسمیاتی بدلی نا کمامدارآتیان بیدس یونیسیف ، جہانی بینک و ماحولیات نا بابت ایلو شریدار آتا نمائندہ غاک ہم ساڑی ئسر۔