راولپنڈی (پاکستان پوائنٹ نیوز18دسمبر 2018ء) چیف آف آرمی اسٹاف جنرل قمر جاوید باجوہ مصر انا وزیر دفاع و عسکری پیداوار و سلہہ بند فوج انا کمانڈر انچیف جنرل محمد ذکی و سلہہ بند فوج انا چیف آف اسٹاف لیفٹیننٹ محمد فرید تون اوڑدہی کرینے، ہرامصر انا سرکاری دورہ غاٹی ءِ۔ دوشنبے نادے آ آئی ایس پی آر نا کنڈآن جاری بیان نارداٹ دااوڑدہی تے ٹی تین پہ تینی است خواہی نا معاملہ، عسکری کہول آ تعلقداری، دفاعی و سیکورٹی کمکاری آ گپ و تران مس۔
مصری سرکڑدہ انسداد دہشت گردی ٹی پاک فوج انا کسبی مہارت و پاکستانی قوم انا عزم انا ستاءِ کرینے۔ ہڑتوم آکنڈآک اسیجا ڈٹ ، دفاعی پیداوار ، تربیت و انٹیلی جنس تون اوار کیہی بشخ آتے ٹی ہڑتوم آ کنڈآتا کمکاری ءِ ودفنگ آ امنا کریر۔ علاقائی امن و سلامتی کن کمکاری ءِ گچین جوڑ کننگ آہم امنا مس۔ چیف آف آرمی اسٹاف الازہر نا امام اعظم شیخ احمد الطیب تون ہم اوڑدہی کرے۔
امام اعظم ملک آن دہشت گردی نا چٹفنگ کن پاک فوج انا کوشست آتا ستاءِ کرے۔ او مچ آ پاکستان نا غٹ مکاتب فکر انا مذہبی اسکالرآتا کنڈآن انتہاپسندی آن ودی مروک آ ویل آتا بارواٹی ”کلہو ءِ پاکستان“ فتویٰ نا جاری کننگ نا ہم ستاءِ کرے۔ اوپارے کہ اسلام اسہ اعتدال پسند ءُ مذہب اسے و پورو ضابطہ حیات ءِ ہرادے جہانی برادری ٹی دہشت گردی ، انتہاپسندی تون بایدے گنڈنگپ ۔ آرمی چیف مسلم ورناتے روشن خیالی ، تکنیکی شونداری ، اعتدال پسندی و ہم آہنگی نا کنڈا اتنگ آ زورشاغا۔ داکان مست بننگ آ مصری فوج انا چاق و چوبند دستہ چیف آف آرمی اسٹاف جنرل قمر جاوید باجوہ ءِ وزارت دفاع ٹی گارڈ آف آنر پیش کرے۔
