پاکستان و چین نا چاگڑد نا بشخ انا شونداری کن تین پہ تینی کمکاری ءِ ودفنگ نا فیصلہ وزیراعظم نا سلاہکار موسمیاتی بدلی ملک امین اسلم نا چینی سفیر تون اوار پریس کانفرنس

پاکستان و چین نا چاگڑد نا بشخ انا شونداری کن تین پہ تینی کمکاری ءِ ودفنگ نا فیصلہ وزیراعظم نا سلاہکار موسمیاتی بدلی ملک امین اسلم نا چینی سفیر تون اوار پریس کانفرنس

اسلام آباد (پاکستان پوائنٹ نیوز18دسمبر 2018ء) پاکستان و چین چاگڑدی نا بشخ انا شونداری کن تین پہ تینی کمکاری ءِ ودفنگ نا فیصلہ کرینو، داچرجوئی ٹی وزارت موسمیاتی بدلی پاکستان و نیشنل فارسٹری و گراس لینڈ ایڈ منسٹریشن چین نا نیام اٹ مفاہمت نا سمجھوتہ پک مس۔ وزیراعظم نا سلاہکار موسمیاتی بدلی ملک امین اسلم و پاکستان اٹی چین نا سفیر یاؤجنگ دوشنبے نادے آ داڑے وزارت موسمیاتی بدلی ٹی ایم او یو آ دستخط کریر۔

مفاہمت نا یات داشت دہ ٹک آتیا تالان ءِ ہرافتے ٹی جنگل آتے رکھ جوڑ کننگ، جنگلی حیات آتا رکھ، موسمیاتی بدلی نا جنگل آتیا منفی زہم، دیری وسیلہ غاتا گچین کاریم اٹ اتنگ، خراب ڈغار نا بحالی، جنگلات و چاگڑدتون تعلقدار ریسرچ و ایلو معاملہ غاتیا تین پہ تینی کمکاری ءِ مون آ دننگ اوار ءِ۔ داوخت آ وزیراعظم نا سلاہکار موسمیاتی بدلی ملک امین اسلم و چینی سفیر اسہ پریس کانفرنس اسے ٹی سمجھوتہ نا غرض و مسخت و جنگل آتا بشخ اٹی ہڑتوم آ کنڈآتا کمکاری نا گمان تیان معلومدار کریر۔

ملک امین اسلم پارے کہ چین موسمیاتی بدلی نا بابت 24می پارٹیز آف کانفرنس اٹی زیات آن زیات بشخ ہلکر و ایکو سولائزیشن نا کسر ءِ اختیار کرینو۔ اوپارے کہ چین چاگڑد نا بشخ اٹی شاندار شونداری کرینے و 2009 ء آن پد آن 5لکھ مربع کلومیٹر رقبہ غا جنگلات خلکونے ہراڑآن اونا جنگل آتے ٹی 12آن 18 درسد اسکان ودکی مسنے ہراانسان نا خلوک آ دنیا نا غٹ آن بھلا جنگل جوڑ مسنے۔

اوپارے کہ حکومت پاکستان چین نا داسرسہب آزموندہ غان فائدہ ہرفنگ نا فیصلہ کرینے و اینو نا معاہدہ ہم ہندا چرجوئی نا کڑی ءِ۔ وزیراعظم نا سلاہکار پارے کہ پاکستان چین اتون دابابت گام پہ گام چلینگ انگ کن تیار ءِ و جنگل آتا بشخ اٹی چین بھاز گڑا ہیل کننگ کیک۔ اوپارے کہ پاکستان چین نا ایکو سولائزیشن پروگرام آن فائدہ ہرفنگ نا خواہندار ءِ انتئے کہ پاکستان 10 بلین ٹری سونامی نا پن اٹ بھلو شجرکاری مہم اسے آ کاریم کننگ ءِ ہرانا جہانی کہول آ اعتراف ءِ کننگ انگ ءِ۔

اوپارے کہ دا ایم او یو آن پاکستان نا 10 بلین ٹری سونامی پروگرام و چین نا گریٹ گرین وال پروجیکٹ نا نیام اٹ کمکاری نا پلیٹ فارم اس دوبریک۔ اوپارے کہ جنگل آتا بشخ انا راجی و اقتصادی شونداری ٹی اہم کڑد ءِ مون آ تخسا اونا مون آ دننگ کن کمکاری ءِ ودفنگ نا فیصلہ ءِ کننگانے۔ ملک امین اسلم پارے کہ سمجھوتہ نا رداٹ جنگل آتے رکھ جوڑ کننگ، جنگلی حیات آتا رکھ، موسمیاتی بدلی نا جنگل آتیا منفی زہم، دیری وسیلہ غاتا گچین کاریم اٹ اتنگ، خراب انگا ڈغار نا بحالی ، جنگل و چاگڑد آتون تعلقدار ریسرچ و ایلو اہم ٹک آتیا تین پہ تینی کمکاری ءِ مون آ دننگک۔

داوخت آ چینی سفیر پارے کہ پاکستان و چین چاگڑد آتا رکھ انا بابت پرعزم ءِ و ہندا سوب ءِ کہ ہڑتوم آ ملک آک دامشن نا دوئی کن اواری اٹ کاریم کننگ نا خواہندار ءُ۔ اوپارے کہ وزیراعظم پاکستان عمران خان چاگڑدنا بشخ ءِ بے حد اہمیت تسنے و او پا ئیدار شونداری نا دوئی کن ہم کوشست کننگ ءِ۔ چینی سفیر پارے کہ اینو نا سمجھوتہ چاگڑد نا رکھ و شونداری نا کوشست آتے ٹی کمکار و مددگار جوڑ مریک۔