لاہور(پاکستان پوائنٹ نیوز18دسمبر 2018ء) گورنر پنجاب چوہدری محمد سرور پارینے کہ حکومت ملک اٹی برآمد آتے ٹی ودکی و کشار گرآتا شرحالی کن سیڈ اٹی جدت و انویسٹمنٹ اتیک، مقابلہ نا دا دور اٹی پوسکن آ ٹیکنالوجی نا کاریم اٹ اتنگ تون اوار اوار ننے سیڈ ریسرچ آ چکار کروئی مریک ہراڑآن ملک اٹی کشاری انقلاب اس اتنگ مریک۔ اودوشنبے نادے آ کشاری شونداری بینک ڈی ایچ اے برانچ اٹی اسلامک بینکنگ سیٹ اپ نا بنائی دود آن تران کریکہ۔
داوخت آ صدر کشاری شونداری بینک شیخ امان اللہ ، باسک بورڈ آف ڈائریکٹر آفاق ٹوانہ و ایلو شخصیت آک ہم ساڑی ئسر۔ گورنر پنجاب چوہدری محمد سرور پارے کہ کشاری شونداری بینک انا وڑاٹ اسلامی بینکنگ نا بناستاکڑزک۔ ہراڑآن کشار گر آتے پبی فائدہ ہرفوئی مرے، حکومت داچرجوئی ٹی ادارہ نا پبی سپورٹ ءِ کیک۔ اوپارے کہ داخت آ اسہ گڑاس ہرا پاکستان ءِ دنیا نا مقابلہ ٹی پدی بٹنگ ءِ او سیڈ و پیداوار نا معاملہ ءِ۔
اوپارے کہ ساڑی آ پوسکن آ دور اٹی پوسکن آ ٹیکنالوجی نا کاریم اٹ اتنگ المی ءِ، داوخت آ ننا بارڈر نا ایلو کنڈ کرپاس نا فی ایکڑ پیداوار اِرا ہزار کلوگرام ءِ وخت اس کہ نناداڑے پیداوار 700 کلوگرام ءِ، اگہ نن کرپاس و خولم مکئی تون اوار ایلو بج آتا ریسرچ آ چکار کین تو ملک اٹی کشاری انقلاب اس اتنگ مریک۔ گورنر پنجاب پارے کہ ہراوخت اسکان ننا ملک اٹی کشت و کشار و بزغر شون ہلپک ہمووخت اسکان شونداری و شونہالی مننگ کپک، دامسخت کن کشاری شونداری بینک تینا قائدانہ کڑد ءِ ادا کننگ کیک۔
چوہدری محمد سرور پارے کہ بنگلہ دیش ءِ جی ایس پی پلس سٹیٹس ملنگ آن پد اونا برآمدآک 3گناودار، ننے ہم برآمد آتا مون آ دننگ کن کاٹن و انڈسٹری ءِ مون آ دننگ تون اوار اوار کاروباری برادری ءِ آسراتی تروئی مریک۔ نیز ننے پیداواری خڑچ آہم چکار کروئی مریک، گورنر پنجاب پارے کہ پوسکن آ کشاری ٹیکنالوجی و پوسکن آ وڑدسنگ نا مون آ دننگ کن کشاری شونداری بینک انا خذمت آک ستاکڑزرہ۔
کشاری شونداری بینک نا بزنس ماڈل نا بدل مننگ ساڑی حکومت نا اولیت آتا رداٹ ءِ۔ ہرا ملکی معیشت اٹی ودکی نا ہم سوب جوڑ مریک۔ بینک انا صدر شیخ امان اللہ پارے کہ ننا کوشست ءِ کہ پوسکن آ کشاری آسراتی و پوسکن آ کشاری مشینری تا کاریم اٹ اتنگ آن بزغر آتے روشناس کرفنگے ہرا ملکی پیداوار اٹی ودکی نا سوب مریک۔ کشاری شونداری بینک ساڑی خذمت آتا پالیسی تا عین رداٹ شونداری نا کسر آ راہی روان ءِ، اوپارے کہ کشاری شونداری بینک اسلامی بینکنگ نا بنا وزیراعظم نا پاکستان ءِ مدینہ منورہ کون آریاست اس جوڑ کننگ نا عزم آ عمل کرسا کرے۔ دود آن کشاری شونداری بینک انا باسک بورڈ آف ڈائریکٹر آفاق ٹوانہ ہم تران کرے۔
