اسلام آباد (پاکستان پوائنٹ نیوز17دسمبر 2018ء) مزن وزیر عمران خان ءَ آرمی پبلک اسکول واکیہ ءِ چارمی سالروچ ءِ درگت ءَ وتی ھاسیں کلوھ ءِ تہ اے جزم ءِ درشان کتگ کہ حکومت ءِ پاکستان ءَ را اے رنگیں ریاست جوڈ کن ایت اودا مذہبی ،لسانی،زات براھندگی ءُُ رنگ ءُُ پدریچ ءِ بنیات ءِ سرا بیم کاری ءُُ لٹ ءُُ کٹ ءِ ہچ جاھ نیست انت۔آہاں گوشت کہ تعلیم یک ہتھیار انت ایشی چہ بیم کاری ءُُ ناشرکاری ءِ دائمی ھلاسی کت کن انت۔
مزن وزیر ہاوس ءِ نیمگا چہ جاڑی کتگیں بیان ءِ ردا مزن وزیر عمران خان ءَ گوشت کہ 16 دسمبر ءِ روچ مارءَ اہمہ سیاھگیں روچ ءِ یات دیئگ انت وھدیکہ ناشرکاراں انسانیتءُُ مذہب ءِ دراھیں راھبندءَ را پروشت دیان ءَ زھگان نشانگ جوڈ کتگ ہمہ کہ تعلیم زورگ ءُُ یک روژن ءِ باندات ءِ امیت کت اسکول ءَ اتکگ ات۔ معصو مءِ جانانی شہادت ءِ اے دلخراش واکیہ ءَ اُودا کہ دراھیں راج ءَ راغم ءُُ ڈکھ رستگ اُودا راج ءِ تہ ناشرکاری ءِ ھلاپ ءَ یکوئی ءُُ وحدت ءَ را ودی کتگ۔
ھداوند ءِ کمک ءُُ دراھیں راج ءِ پلہ مرزی ءَ گوں مئے دلیریں اُردو ءُُ کانود برجاہ داروکیں ادارگہاں آپریشن ضرب ِعضب ءُُ ردالفسادءِ وسیلگ ءَ ناشرکاری ءِ ھلاپ ءَ ہمہ جنگ مڑاتگ کہ ایشی مثال نیست انت۔اے پی ایس واکیہ ءِ تہ جتا بیوکیں یات ہر وھد ساڑی بیت۔مروچیگیں روچ ءِ تہ اے پی ایس ءِ معصوم شہیداں را خراج تحسین پیش کنگ ءِ ھوار ہمہ گمیں والدین ءِ گوما دلپدردی ءِ درشان کنگ انت کہ آہاں وت جگر ءَ را تعلیم ءِ ھاترا دیم داتگ ات بلے آں شہادت ءِ شال کنان ءَ گساں واتر بوتگ۔
سرجمیں راج معصومیں شہیداں گوں ھوار انت ءُُ آہانی ڈکھ ءَ بروبر ءِ شریک انت۔پاکستانی راج ءَ ناشرکاری ءِ ھلاپ جنگ ءِ تہ ہمہ کیمت ادا کتگ کہ ایشی ہچ اندازگ نیست انت۔ہزاراں جانانی قربانی دیگ ءُُ مزنیں کساس معاشی تاوان زورگ ءِ ابید اگہ مروچی ھم کسے پاکستان ءِ سرا بہتام زنی کنگ انت یا مارءَ کجام دروشم ءَ قصور وار گوشگ انت تو ایشی ءِ سرا اے کلوھ دیگ لوٹگوں کہ دگنیا ءِ جنگ ءِ درستاں شہ مزنیں کیمت مئے اردو ،سپاہیاں،بے ڈوھیں شہریاں ادا کتگ۔
من ایشی ءَ ہم پدر کناں کہ بے کساسیں تاوان ءِ ابید مہ یک راج ءِ بستار ءَ ملکی،دمگی ءُُ میاں اوستمانی امن ءِ ھاترا جزم دارانت۔ مروچیگیں روچ ءِ درگت ءَ من اے گپ ءِ درشان کنگ لوٹاں کہ تعلیم ہمہ ہتھیار انت ایشی ءِ سبب ءَ مہ ناشرکاری ءُُ آسرکاری ءَ را دائمی وڈ ءَ پروشت دیگ بہ بیت۔مئے حکومت پرجزم انت کہ مہ پاکستان ءَ را اے رنگیں چاگرد جوڈ کنیں کہ اُودا بیم کاری،مزہب ،لسانیت،رنگ ءُُ پدریچ کجام وڈ ءِ سرا آسرکاری ءُُ لٹ ءُُ کُٹ ءَ سگگ مہ بیت۔
مروچیگیں روچ ءَ وتی دلیریں فوج ءُُ کانود برجاہ داروکیں دراھیں ادارگہانی ہمہ ہیروز ءَ سلام پیش کنگ اوں کہ آہاں ناشرکاری ءِ ھلاپ ءَ جنگ ءِ تہ وتی جان ندر کتگ انت۔وتی شہیداں را خراجِ تحسین پیش کنگ ءِ درستاں چہ گہتریں وڈ اے مکسد ءِ ھاترا پُرجزم بوھگ انت ہمہ مستریں مکسد ءِ ھاترا آہاں وتی جانانی قربانی داتگ انت۔(ن۔ا۔ج)
