وزیر خارجہ شاہ محمود قریشی نا اقوام متحدہ نا انسانی حق نا دے انا وخت آ کلہو

وزیر خارجہ شاہ محمود قریشی نا اقوام متحدہ نا انسانی حق نا دے انا وخت آ کلہو

اسلام آباد(پاکستان پوائنٹ نیوز11دسمبر 2018ء) وزیر خارجہ شاہ محمود قریشی مقبوضہ جموں و کشمیر اٹی انسانی حق انا پدریسہ سنگین پامالی کودک کشمیری تا برخلاف ڈوہ انا جاست وپاست کن اقوام متحدہ نا جاست وپاستی کمیشن اس ٹہیفنگ نا خواست ءِ کرینے۔ او داہیت ءِ اقوام متحدہ نا انسانی حق انا ڈکلیریشن نا 70 برس پورو مننگ آ تینا کلہو اٹی پارینے۔ وزیر خارجہ پارے کہ مقبوضہ کشمیر اٹی بھارتی کوزہ گر فوج اناکنڈان طاقت نا بے رحمانہ کاریم اٹ اتنگ و انسانی حق انا منظم پامالی تا داسہ اقوام متحدہ ، اوآئی سی و برطانوی پارلیمان نا آل پارٹیز گروپ کشمیر ہم باضابطہ تصدیق ءِ کرینے، اسہ ہندن ءُ وخت اسے ٹی ہراتم مچ آ دنیا ٹی انسانی حق انا گچینی نا رداٹ پیش رفت ہُننگ کن ملنگ ءِ دُن انگا وخت اٹی بایدے نن کشمیری تے گیرام کپن ہرا داصدی و دادوراٹی ہم درملکی تسلط نا سیخا ٹی جبر انا زند ءِ تدیفنگ آ بیوس ءُ۔

وزیر خارجہ پارے کہ انسانی حق انا جہانی اعلامیہ نا سال دے انا وخت آ نن مقبوضہ جموں و کشمیر نا بہادر الس ءِ خراج تحسین پیش کینہ ہراتینا روا حق خودارادیت کن بھارتی وحشت و بربریت نا پامردی اٹ مقابلہ ءِ کننگ ءُ۔ 1948 ء ٹی اینو نا ہی دے جہانی برادری انسان نا آجوئی، وقار و بریبری حق آامنا ظاہر کرے ، دااعلامیہ پیشن نا کوزہ و تسلط نا برخلاف آجوئی نا تحریک آتے مون آ دننگ، سنگین انسانی حق انا پامالی تا توننگ و آجوئی نا بنداوی حق انا دوئی ٹی کلیدی کڑد ادا کرے۔

وزیر خارجہ انسانی حق انا دااہم دستاویز نا مسودہ نا تیاری ٹی بیگم شائستہ اکرام اللہ نا خذمت آتیا پاکستان ءِ فخر ءِ۔ وزیر خارجہ پارے کہ نن پہہ مرینہ و پاکستان نا دا موقف ءِ کہ نیزگاری و نا انصافی تے ٹی کمتی، جان جوڑی و تعلیم اسکان اسہ وڑ رسینگ، کُننگ کن صاف دیر انا فراوانی و سینٹیشن ، چاگڑد نا رکھ، انسانی وقار نا شرف ءِ المی جوڑ کننگ، انصاف ، بریبری و امن و سوگوی ءِ المی جوڑ کننگ تون اوار جامع طرز انا کمک اٹ غٹ انسان تا شاری ، سیاسی ، اقتصادی ، معاشی، راجی و دودوربیدگی حق ءِ المی جوڑ کننگ مریک۔

وزیر خارجہ پارے کہ بابائے قوم قائد اعظم محمد علی جناح انسانی عظمت و وقار ، بریبری، انصاف و راج انا غٹ تپہ غاتا بنداوی حق انا رکھ اکن راہشون اصول تسنے۔ اوپارے کہ پاکستان اقوام متحدہ نا انسانی حق انا اعلامیہ و اونا مسخت آتے مون آ دننگ کن ملکی و جہانی کہول آ کاریم کننگ اٹی پرعزم ءِ۔