کوئٹہ (پاکستان پوائنٹ نیوز11دسمبر 2018ء) کوآرڈنیٹر پولیو ایمر جنسی سینٹر بلوچستان راشد رزاق پارینے کہ مسہ دے ئی انسداد پولیو مہم اینو آن بناکرینے، سیکورٹی نا سخت رکھی بست و بند کننگانے، کوئٹہ ، قلعہ عبداللہ و پشین اٹی پولیو پنچ دے اسکان برجاسلک، انسداد پولیو مہم اٹی پنچ سال اسکان نا وئی نا 25لکھ آن زیات چناتے پولیو آن بچفنگ نا پڑی کنفنگ نا ہدف ءِ مقرر کننگانے ، مہم اٹی 10 ہزار 356نا خڑک ٹیمک بشخ ہلیرہ ہرافتے ٹی 8 ہزار 829 موبائل ٹیم، 951فکسڈ سائٹ و 576ٹرانزٹ ٹیمک اوار ءُ، انسداد پولیو مہم نا غٹ تر تیاری تے پورو کننگانے وخت اس کہ کوئٹہ ، پشین و قلعہ عبداللہ ٹی انسداد پولیو مہم پنچ دے اسکان چلیفنگک۔
داخیال آتا درشانی ءِ او دوشنبے نادے میڈیا تون ہیت وگپ کرسا کرے۔ کوآرڈنیٹر پولیو ایمر جنسی سینٹر بلوچستان راشد رزاق پارے کہ پولیو ءِ چٹفنگ کن انسداد پولیو نا ہر مہم اٹی پنچ سال اسکان وئی نا ہر چناءِ پولیو آن بچفنگ نا ویکسین کنفنگ المی ءِ۔ کوآرڈنیٹر پولیو ایمر جنسی سینٹر راشد رزاق پارے کہ عالم دین و سیاسی جماعت آتا راہشون تیا بھلو زمواری اس مریک کہ او نہ من لمہ و باوہ غاتے راضی کننگ اٹ تینا کڑد ءِ ادا کیر،اوپارے کہ میڈیا و شاری تیان خواست ءِ کہ او دامہم ءِ سرسہب کننگ کن تینا کلیدی کڑد ادا کیر تانکہ ننا چناک آخبتی معذوری آن بچنگ کیر۔
اسہ سوج اسے نا ورندی ٹی اوپارے کہ انسداد پولیو مہم کن سیکورٹی نا بست و بند آتے ہم پورو کننگانے ہراٹی بلوچستان لیویز و پولیس نا عملہ تعینات مریک وخت اس کہ فرنٹیئر کور بلوچستان ہم ودکی سیکورٹی فراوان کیک، راشد رزاق لمہ و باوہ غاتیان خواست کرسا پارے کہ او تینا چناتے پولیو آن بچفنگ نا وار وار ضرور کنفر انتئے کہ دا وائرس داڑے ساڑی ارے ہراوخت انا وخت اس دا چناتے آ جلہو کننگ کیک۔
