اسلام آباد(پاکستان پوائنٹ نیوز11دسمبر 2018ء) وزیر خارجہ شاہ محمود قریشی پارینے کہ چین اتون سنگتی پاکستان نا خارجہ پالیسی نا اہم انگا تمبہ ءِ ، گچین و دیر پا نتیجہ غاتا دوئی کننگ کن چین پاکستان اقتصادی راہداری (سی پیک) ڈٹ آتا معاشرتی و اقتصادی پلو آتیا خصوصی چکار کننگک۔ اوداہیت ءِ دوشنبے نادے داڑے چین نا کمکار وزیر خارجہ کونگ زوآن یو تون وزارت خارجہ ٹی اوڑدہی ٹی ہیت وگپ کرسا پارے۔
اوڑدہی ٹی علاقائی سیکورٹی تون اوار تین پہ تینی است خواہی نا معاملہ غاتیا گپ و تران کننگا۔ اوڑدہی ٹی ڈیہہ ءِ مون تروک ویل آتا ایسری و ہڑتوم آ کنڈآتا تعلقداری تے پین مون آ دننگ کن اسیجا کوشست آتے کاریم اٹ اتنگ آ امنا کننگا۔ وزیر خارجہ پارے کہ چین اتون سنگتی پاکستان نا خارجہ پالیسی نا اہم انگا تمبہ ءِ۔ اوپاک چین وزیر خارجہ غاتا کہول انا سٹریٹجک مذاکرات آ است جمی نا درشانی ءِ کرے۔
وزیر خارجہ پارے کہ گچین و دیر پا نتیجہ غاتا دوئی کننگ کن سی پیک ڈٹ آتا معاشرتی و اقتصادی پلو آتیا خصوصی چکار کننگک۔ وزیر خارجہ سی پیک نا رداٹ ”خصوصی اقتصادی زونز“ نا زوت جوڑ کننگ آہم زور شاغا۔ وزیر خارجہ کمکار چینی وزیر خارجہ ءِ کابل اٹی مروک آ ارٹ می سہ باسکی پاکستان، چین اوغانستان مذاکرات اٹی تینا شرکت و دابابت پیش رفت آن معلومدار کرے۔ اوپارے کہ اوغانستان اٹی امن و سوگوی کن چین نا کوشست آک ستاکڑزرہ۔ چین نا کمکار وزیر خارجہ پارے کہ چینی وزیراعظم نا وژن نارداٹ چین پاکستان نا معاشی و معاشرتی شونداری و نیزگاری نا چٹفنگ کن پاکستان تون پبی کمک کننگ کن پرعزم ءِ۔
