کوئٹہ(پاکستان نیوز پوائنٹ 25اکتوبر2016ء) کوئٹہ شار آن 13کلو میٹر نا فاصلہ غا سریاب روڈ آ واقع پولیس ٹریننگ سینٹر اٹی دوشنبے و سے شنبے نا نیامی نن 3خودکش جلہو گیر آتا جلہو اٹی فرنٹیئر کور بلوچستان نا کم از کم 59کیڈٹ تپاخت و 90 پین کیڈٹ و افسرآک ٹھپی مسنو۔ صوبائی وزیر داخلہ و آئی جی ایف سی خودکش جلہو ءِ پک کرسا پاریر کہ جلہو گیر آتا تعلق لشکر جھنگوی العالمی آن ئس۔
سنڈیمن سول ہسپتال کوئٹہ نا ڈاکٹرز آتارداٹ ہسپتال اٹی پولیس و کانود نافذکروک آ ادارہ غاتا باسک آتا 56لاش تموک ءُ وخت اس کہ بولان میڈیکل نا انتظامیہ پارے کہ اوفتے آ مسہ لاش اتنگانے۔ صوبائی وزیر داخلہ میر سرفراز بگٹی و انسپکٹر جنرل فرنٹیئر کور بلوچستان میجر جنرل شیرافگن پارے کہ کالعدم عسکری تنظیم لشکر جھنگوی العالمی آن تعلق تخوک آ مسہ خودکش جلہو گیر آک دوشنبے نا نن نیمہ غا پولیس ٹریننگ سینٹر ہرا 12ایکڑآ تالان ءِ و ہراٹی 700 آن 800 ریکروٹس ءِ تربیت تننگ نا لائخی ءِ آ جلہو کریر۔
جلہو گیر آک پولیس ٹریننگ سینٹر ناواچ واٹر آ تعینات پولیس کارندہ غا سم کاری کریر و اونا خون ءِ کننگ آن پد مین ہاسٹل اٹی پترینگار ہراڑے 200 کیڈٹس خاچوک ئسر یا آرام کریرہ ۔ سینئر کمامدارآتارداٹ پاک فوج، فرنٹیئر کور ، پولیس و بلوچستان کانسٹیبلری نا دستہ غاک دمدستی وڑاٹ موقع غا سرمسر اوکان گڈ دہشت گرد و سیکورٹی فورسز آتا نیام اٹ سم کاری بناء کرے ہرا مسہ گھنٹہ برجاء سلیس۔
ہر مسٹ آ دہشت گردآک خودکش جیکٹس بیناسر۔ اِرا خودکش جلہو گیر آک ہاسٹل اٹی تینے دھماکہ اٹ ترخفیر و اسٹ ءِ سیکورٹی فورسز آک تپاخت کریر۔ کمانڈر سدرن کمانڈ لیفٹیننٹ جنرل عامر ریاض ، میر سرفراز بگٹی ، میجر جنرل شیرافگن و آئی جی بلوچستان احسن محبوب موقع غا سرمرسا دہشت گرد آتا برخلاف سیکورٹی فورسز آتا آپریشن نا چاروکی ءِ کریر۔ ایف سی نا ترجمان اے پی پی تون ہیت وگپ کرسا دا ہیت ءِ پک کرے کہ آئی جی ایف سی میجر جنرل شیرافگن دہشت گرد آتا برخلاف آپریشن نا سپر ویژن کرے۔
آئی جی ایف سی نا رداٹ دہشت گرد آک اوغانستان آن لشکر جھنگوی العالمی آن ہدایت ہلکورہ۔ دہشت گرد آتا برخلاف آپریشن اٹی پاک فوج ، ایف سی و پولیس کمانڈوز آک بشخ ہلکر۔ آپریشن نا کمک اٹ پولیس ٹریننگ سینٹر ءِ کلیئر کرفنگانے و علاقہ آن گدرینگوک آ کسر ءِ ٹریفک کن ملنگانے۔کوئٹہ نا سرکاری ہسپتال آتیٹی ایمر جنسی نافذ کننگانے۔ ٹھپی مروک آتے اول سول ہسپتال کوئٹہ غا اتنگا و اوفتے آن گیشتر ءِ گڈ اٹی سی ایم ایچ گدریفنگا۔
وزیراعلیٰ بلوچستان نواب ثناء اللہ خان زہری ہرا دہشت گرد آتا برخلاف آپریشن نا چاروکی ءِ کریکہ بڑزکو کہول نا دیوان اسے نا کماشی ءِ کرے ہراٹی سرکاری کمامدار و کانود نافذ کروک آ ادارہ غاتا افسرآک شرکت کریر۔ گورنر بلوچستان محمد خان اچکزئی و وزیراعلیٰ بلوچستان نواب ثناء اللہ زہری پولیس ٹریننگ سینٹر اٹی دہشت گردی نا واقعہ نا مذمت ءِ کرسا پارے کہ نن دہشت گرد آتا برخلاف حالیت جنگ اٹی اُن۔ دہشت گرد آک تینا کارروائی تا کمک اٹ ننے شکست تننگ کپسہ۔ نن آخریکو دہشت گرد انا چٹفنگ اسکان دا جنگ ءِ برجاتخنہ۔ کمامدارآتارداٹ شکبر بندغ آتا پٹنگ و دزگیری کن صوبائی دارالحکومت نا کیہی علاقہ غاتیٹی سرچ آپریشن نا بنا کننگانے۔
