کوئٹہ (پاکستان پوائنٹ نیوز29 نومبر2018ء) ڈائریکٹر جنرل محکمہ جان جوڑی بلوچستان ڈاکٹر شاکر بلوچ پارینے کہ بلوچستان اٹی داسال صوبائی ایڈز کنٹرول پروگرام یونیسیف و ایلو ادارہ غاتا کمک اٹ ورلڈ ایڈز ڈے ءِ پبی وڑاٹ اڈتننگک، ہر سال انا جتا ءُ تھیم اس مریک داسال ایڈز ڈے انا تھیم ایچ آئی وی ایڈز آن زہمی بندغ آتون امتیازی سلوک آن انکار و (Gate Tested Know your status) نا وڑاٹ اڈتننگ انگ ءِ دادے ءِ اڈتننگ نا مسخت ایچ آئی وی ایڈز انا بابت خلقت اٹی آگاہی و شعور ودی کروئی ءِ ، بلوچستان اٹی ایڈز انا مریض آتا کچ 3500 آن ودسا 5000 اسکان سرمسنے و داکچ آن بلوچستان اٹی ایڈز کنٹرول پروگرام تون 1334 مریض رجسٹرڈ ءُ، داخیال آتا درشانی ءِ او پنچ شنبے نادے کوئٹہ پریس کلب اٹی پریس کانفرنس آن تران کرسا کرے۔
داوخت آ ڈاکٹر داؤد خان اچکزئی، ڈاکٹر افضل زرکون و ایلوفک ہم ساڑی ئسر۔ ڈائریکٹر جنرل محکمہ جان جوڑی بلوچستان ڈاکٹر شاکر بلوچ پارے کہ ایچ آئی وی ایڈز انا 911 مریض آتا درمان جاری ءِ ، کوئٹہ ٹی رجسٹرڈ مریض آتا کچ 1033 وخت اس کہ تربت اٹی 301ءِ۔ اوپارے کہ بلوچستان نا ایلو ضلع قلعہ سیف اللہ، ژوب، شیرانی، گوادر ، لورالائی ، لسبیلہ ، نوشکی ، قلعہ عبداللہ و پشین اٹی ہم ایچ آئی وی ایڈ ز انا مریض ارے، اومستی پارے کہ گڈانی ، کوئٹہ ، تربت و ایلو جیل تے ٹی 4404 بندی تا ٹیسٹ ءِ کننگا تو اوفتیان 71 مریض ایچ آئی وی ایڈزاٹی مبتلائسر ہراکہ اسہ المیہ اسے، پاکستان اٹیی داوخت اسکان ایچ آئی وی ایڈزآن کہوک آتا کچ 6200 ءِ وخت اس کہ بلوچستان اٹی 231 بندغ مرک انا باٹی ہنانو۔
ڈائریکٹر جنرل جان جوڑی پارے کہ بلوچستان اٹی غٹ تپہ غاتا زمواری مریک کہ ایڈزا نا برخلاف خلقت اٹی شعور و آگاہی بیدار کیر اسلامی تعلیمات آتیا عمل کرسا ایڈز کون آ ہلوک آ ناجوڑی آن انسانی زند آتے بچفنگ مریک ، اوپارے کہ بلوچستان اٹی لیبارٹری اسٹنٹس و ڈاکٹر آتے باقاعدہ تربیت تننگانے ، محکمہ تعلیم ، سول سوسائٹی نا ادارہ، میڈیا نمائندہ ، عالم دین تے کن آگاہی نا سیشن آتا بست و بند ءِ کننگانے۔ اوپارے کہ بلوچستان ایڈز کنٹرول پروگرام ایڈز آن بچفنگ کن پبی وڑاٹ کاریم کننگ ءِ۔
