اسلام آباد (پاکستان پوائنٹ نیوز29 نومبر2018ء) برطانیہ نا پاکستانی نژاد کونسلر و بورو آف برینٹ لندن نا میئر ارشد محمود وزیراعظم عمران خان و چیف جسٹس آف پاکستان جسٹس ثاقب نثار نا کنڈان ملک اٹی دیر انا کاختی نا مون ءِ توننگ نا چرجوئی ٹی دیامر بھاشا و مہمند ڈیم انا جوڑ کننگ کن فنڈ قائم کننگ نا گام انا ستاءِ کرینے۔ تدوک آ دے داڑے لندن اٹی فنڈ جمع کننگ نا دود اٹی میڈیا تون ہیت وگپ کرسا اوپارے کہ سمندر پار خاص کر برطانیہ ٹی رہینگوک آ پاکستانی شاریک وزیراعظم و چیف جسٹس آف پاکستان نا دافیصلہ نا ستاءِ کرینو ، دا ملکی کاز اکن اہم ءُ گام اسے و نن دا چرجوئی ٹی پبی کمک کینہ۔
دود انا بست و بند ءِ ورلڈ کانگریس آف اوورسیز پاکستانیک کریسر ہراٹی چیف جسٹس ثاقب نثار ہم بشخ ہلک۔ ارشد محمود ، ہرانا تعلق برطانیہ نا لیبر پارٹی تون ءِ، پارے کہ اوورسیز پاکستانیک مدام تینا پاکستانی ایلم تتون تفوک مسنوو ضرورت نا وخت اٹی اوفتے ہروڑاٹ امداد و کمک فراوان کرینو۔ ڈیم فنڈ انا معاملہ ٹی ہم اوورسیز پاکستانیک تینا پبی کمک ءِ کیرہ۔ اوچیف جسٹس آف پاکستان نا دورہ برطانیہ و ڈیم اکن عطیہ جمع کننگ نا گام گیج انا ستاءِ کرینو۔ اوپارے کہ پاکستان ننا وطن ءِ و نن تینا ملک انا شونداری و شونہالی نا متمنی اُن۔
