اسلام آباد (پاکستان پوائنٹ نیوز29 نومبر2018ء) حکومت و اپوزیشن نا نیام اٹ پبلک اکاؤنٹس کمیٹی نا چیئرمین نا معاملہ غا تنازعہ برقرار ءِ ولے اسپیکر قومی اسمبلی اسد قیصر دا ویل ءِ جوان وڑاٹ طے کننگ کن حکومتی و اپوزیشن راہشون آتون رابطہ غاتا بناءِ کننگانے۔ اومیت کننگ انگ ءِ کہ قومی اسمبلی نا بروک آ سیشن اسکان پبلک اکاؤنٹس کمیٹی تون اوار ایلو قائمہ کمیٹی تا ٹہیفنگ نا مرحلہ پورو کننگک۔
قومی اسمبلی سیکرٹریٹ نا ذرائع نارداٹ پبلک اکاؤنٹس کمیٹی نا چیئرمین نا معاملہ غا حکومت و اپوزیشن نا نیام اٹ تنازعہ نا قابل عمل ایسری ءِ کشنگ کن اسپیکر قومی اسمبلی اہم حکومتی راہشون آتون اوار اوار اپوزیشن نا سرکڑدہ غاتون ہم سلابت نا بناءِ کرینے۔ ذرائع اومیت ظاہر کرینے کہ دا معاملہ قومی اسمبلی نا بروک آ سیشن اسکان جوان وڑاٹ ایسر کننگک۔
یات سلے کہ حکومت نا کنڈان قائد حزب اختلاف میاں شہباز شریف ءِ پی اے سی نا چیئرمین جوڑ کننگ آ پاناد کننگ انگ ءِ وخت اس کہ اپوزیشن نا خواست ءِ کہ اِرا دور آن پی اے سی نا چیئرمین اپوزیشن لیڈر ءِ جوڑ کننگ نا روایت بایدے برقرار سلے۔ ہندا تنازعہ نا سوب آن قومی اسمبلی نا 29 قائمہ کمیٹی تا ٹہیفنگ ہم التواء نا گواچی ءِ۔ قومی اسمبلی نا قاعدہ و ضابطہ نا قاعدہ 200 نار داٹ وزیراعظم نا سوغند ہرفنگ نا 30 دے انا تہٹی قائمہ کمیٹی تا ٹہیفنگ نا مرحلہ ءِ پورو کننگ المی مریک۔
