لندن(پاکستان پوائنٹ نیوز28نومبر2017ء) چیف جسٹس پاکستان، جسٹس میاں ثاقب نثار پارینے کہ پوسکن آ ڈیم تا جوڑ کننگ پاکستان نا بروک آ چین تا آخبت کن المی ءِ، دیر انا ودوک آ تنکی نا رداٹ ملک اٹی پین ڈیم تا جوڑ کننگ المی ءِ، دیر انا تنکی ءِ ایسر کننگ و ڈیم تا جوڑ کننگ کن فنڈ انا نامناسب کاریم اٹ اتنگ نا موکل تفنہ۔ داخیال آتا درشانی ءِ او لندن اٹی میڈیا تون ہیت وگپ کرسا کرے۔
چیف جسٹس پارے کہ ڈیم تا جوڑ کننگ کن سمند رپار پاکستانی تا ردعمل ننا اومیت آتیان ود ئس۔ پاکستانیک ملوک آ است اٹ عطیہ جمع کرفیر۔ کنے سمندر پار رہینگوک آ پاکستانی تیان داخہ در قراخدلانہ عمل نا اومیت الوکہ و کنے بھاز خوشی مسنے کہ سمندر پار پاکستانی داقومی مسخت کن جوش و جوزہ تون مون آ بسنو ہرا بے کچ ستاکڑزک و نن غٹ اوفتا منت وار اُن۔ چیف جسٹس پارے کہ غیر متنازعہ ڈیم تا عدم تعمیر مجرمانہ ڈیوالائی ءِ۔
پاکستان ءِ تینا بقاء کن ڈیم تا جوڑ کننگ آ چکار کروئی مریک انتئے کہ دیر زند انا اومیت ءِ، ننا بروک آ چین تا آخبت اٹی پوسکن آ ڈیم تا جوڑ کننگ المی ءِ۔ ننے زیان مروک آ دیر ءِ بچفنگ آ تینا چکار ءِ کروئی مریک۔ اوپارے کہ پاکستان اٹی ڈغار نا تہٹی دیر انا کچ بھاز کم مننگ ءِ ہراپاکستان اٹی چنکا و بھلاشار تے ٹی ہردے ئی زند ءِ زہمی کننگ نا بناءِ کرینے۔
بدقسمتی اٹ گدرینگوک آ 40 سال اٹی حکومت آک دیر انا تنکی نا سنگین ویل ءِ ایسر کننگ آ ہچ ءُ خاص ءُ چکار اس کننگتو و نئے ڈیم تا جوڑ کننگ آ چکار کننگا۔ پاکستان اٹی آخیری ڈیم 40 سال مست جوڑ مسوسس۔ اوپارے کہ داسہ قربانی تا وخت بسنے و ننے تینا بروک آ چین نا رکھ اکن پوسکن ءُ ڈیم تا جوڑ کننگ نا چکار کروئی مریک۔ چیف جسٹس پارے کہ او ڈیم فنڈ آ نظر تخنگ کن اسہ بینچ اسے نا جوڑ کننگ آ سجفنگ ءِ تانکہ ڈیم فنڈ پین مسخت اسے کن کاریم اٹ اتنگپس۔
