اسلام آباد (پاکستان پوائنٹ نیوز28نومبر2017ء) گلگت بلتستان اٹی امریکی ادارہ بین الاقوامی ترقی(یو ایس ایڈ) نا مالی کمکاری آن پورو کروک آ ”ستپارہ ڈویلپمنٹ پروجیکٹ“ آن دیر انا کاختی نا ویل انا مون ءِ توننگ آن علاقہ ٹی آبی وسیلہ نا کاختی نا سوب آن مروک آ نسخان اٹی 60 درسد کمتی واقع مسنے، ڈٹ انا پوروی آن علاقہ نا 8 ہزار آن زیات کشار گر آتا کٹیا ءِ ودفنگ اٹ کمک رسینگانے و داکان بیدس کشاری پیداوار اٹی ہم ودکی مریک۔
یو ایس ایڈ نا کنڈان جاری بیان نا رداٹ دا ڈٹ یو ایس ایڈ نا مالی کمک وخت اس کہ آغاز خان فاؤنڈیشن و آغاخان رورل سپورٹ پروگرام نا رداٹ اواری اٹ پورو کننگانے۔ ڈٹ آن علاقہ ٹی کشاری مسخت آتے کن آبپاشی نا دیر انا مننگ ءِ المی جوڑ کننگ اٹ کمک ملانے و دانا پوروی آن علاقہ ٹی 1200 پوسکن ءُ کاروبار جوڑ کننگ تون اوار اوار گلگت بلتستان اٹی 4ہزار آن زیات روزگار نا پوسکن ءُ وارخواہی ہم ودی مریک۔
گلگت بلتستان اٹی آبپاشی نا دیر انا دستیابی آن علاقہ ٹی ودی کروک آ کشاری مصنوعات آتے لاہور اسلام آباد کون آ بھلا مارکیٹ آتسکان رسینگ دوئی مریک ہراڑان علاقہ نا وسیلہ ، کٹیا نا مون آ دننگ و نیزگاری نا چٹفنگ اٹی کمک رسینگک۔ ستپارہ ڈویلپمنٹ پروجیکٹ گلگت بلتستان نا شونداری و شونہالی ٹی کلیدی کڑد ادا کیک و داڑان علاقہ نا معیشت آ خوشگوار زہم تمک۔
