تعلیم نئے بیرہ ہر چنانا بنداوی حق ءِ بلکن تعلیم ہروڑنا شونداری نا بنداو ءِ، گورنر بلوچستان امان اللہ خان یاسین زئی

کوئٹہ(پاکستان پوائنٹ نیوز28نومبر2017ء) گورنر بلوچستان امان اللہ خان یاسین زئی پارینے کہ تعلیم نئے بیرہ ہر چنا نا بنداوی حق ءِ بلکن تعلیم ہر وڑنا شونداری نا بنداو ہم ارے، گرج داہیت انا ءِ کہ صوبہ نا مر مر انگا علاقہ غاتیان تعلق تخوک آ محروم و نیزگار طالب علم آتے تعلیم نا زیور آن آراستہ کننگے تانکہ او تینا ڈکھوک آلائخی تے ملک و قوم انا شونداری و شونہالی کن کاریم اٹ اتنگ کیر۔

اوپارے کہ بلوچستان ایجوکیشن فاؤنڈیشن صوبہ نا نیزگار و نادار طالب علم آتے کن مفت تعلیم نا فراوانی و صوبہ نا مر مر انگا ضلع غاتے ٹی پرائمری اسکول آتے جوڑ کننگ ہراڑے سرکاری اسکول ساڑی مف اسہ ستاکڑزوک ءُ عمل اسے۔ داخیال آتا درشانی ءِ او گورنر ہاؤس کوئٹہ ٹی بلوچستان ایجوکیشن فاؤنڈیشن نا بورڈ آف ڈائریکٹرز نا دیوان نا کماشی ءِ کرسا کرے۔

داوخت آ صوبائی وزیر تعلیم محمد خان لہڑی، مسکوہی اسپیکر بلوچستان اسمبلی راحیلہ حمید خان درانی ، ایڈیشنل چیف سیکرٹری سجاد احمد بھٹہ، سیکرٹری تعلیم محمد طیب لہڑی، پرنسپل سیکرٹری ٹو گورنر نصیب اللہ بازئی و ایم ڈی بلوچستان ایجوکیشن فاؤنڈیشن پروفیسر عبدالتواب خان اچکزئی تون اوار بی ای ایف نا بورڈ باسک آک ہم ساڑی ئسر۔ بورڈ آف ڈائریکٹر نا دیون اٹی ساڑی مروک آک سلاہ و سوج تسر ہرافتا نتیجہ ٹی کیہی اہم فیصلہ کننگا۔