گلگت(پاکستان پوائنٹ نیوز28نومبر2017ء) وزیراعلیٰ گلگت بلتستان حافظ حفیظ الرحمان پارینے کہ بھاز کوشست و قربانی تیان امن مسنے، ننے غٹ ءِ اواری اٹ دانا پہرہ داری ءِ کروئی ءِ، الس مسلکی ، علاقائی و قومیت نا پن آ سیاست کروک آتے مسترد کے، گلگت بلتستان نا الس تون کروک آ غٹ وعدہ غاتے گونڈ ءُ وخت اسے ٹی پورو کرینے، نن غٹ تعصب آتیان اینک مرسا گلگت بلتستان نا خذمت ءِ کرینن۔
داخیال آتا درشانی ءِ وزیراعلیٰ گلگت بلتستان حافظ حفیظ الرحمان سے شنبے نادے حراموش کٹوال ویلی روڈ انا جوڑ کننگ نا بنائی دود آن تران کرسا کرے۔ وزیراعلیٰ پارے کہ حراموش کٹوال ویلی روڈ انا کاریم یک ءُ نیم سال اٹی پورو کننگک داڈٹ انا جوڑ کننگ آن الس اٹی شونہالی بریک و سیل و سوات ءِ مون آ دننگک۔ کے کے ایچ انا جوڑ کننگ آن مست گلگت بلتستان اٹی خلقت خل تا دوراٹی رہینگارہ، کے کے ایچ انا جوڑ کننگ آن پد ہر بشخ اٹی انقلاب اس بس ، الس نا زندی آب گچین مس۔
اوپارے کہ 34ارب نا بھلو پیسہ سے آن سکردو روڈ آ کاریم برجاءِ داڈٹ آن بلتستان نا جوڑو شونداری تون سیل و سوات نا بابت انقلاب بریک ، نن جوڑ کننگ وشونداری نا ایجنڈا ءِ پورو کننگ کن مسلکی و برادری بشخ وپانٹ ءِ چٹفوئی ءِ۔ سیاست کن مسلک و قومیت نا خار تے تالان کروک آتے الس مسترد کے، گچین کاری ٹی تینا نمائندہ غاتا گچین کاری بیرہ اہلیت و کارکڑد نا بنداو آ کیر۔
اوپارے کہ حراموش نا جوڑ و شونداری ءِ المی جوڑ کینہ۔ 24کروڑ روپئی نا خڑچ آن حراموش کٹوال ویلی روڈ ءِ جوڑ کننگ انگ ءِ داڈٹ آن حراموش نا الس نا زندی آب گچین مریک، حراموش اٹی سیل و سوات ءِ مون آ دننگ رسینگک۔ وزیراعلیٰ پارے کہ 16 تُو انا چنکو وخت اسے ٹی حراموش کٹوال ویلی روڈ انا کاریم ءِ پورو کننگک۔ الس داڈٹ انا آب ءِ المی جوڑ کننگ کن داڈٹ انا چاروکی ءِ کیر۔ اوپارے کہ ہر تُو اٹی اِرادے جدید موبائل ہسپتال حراموش نا دورہ ءِ کیک۔ گچین طبی آسراتی تے المی جوڑ کننگ کن 10 کٹ حراموش ہسپتال ءِ پی پی ایچ آئی نا حوالہ کننگے۔
