اسلام آباد(پاکستان نیوز پوائنٹ 03 اکتوبر2016ء) وزیراعظم محمد نواز شریف نا کماشی ٹی کشمیر نا ویل و لین آف کنٹرول نا حالیت آتیا اسیجائی لائحہ عمل اس تیار کننگ کن پارلیمانی جماعت آتا کسرشون آتا دیوان دوشنبے آ داڑے وزیراعظم آفس اٹی مس۔ دیوان اٹی پاکستان پیپلزپارٹی نا کسرشون سید خورشید احمد شاہ، بلاول بھٹو زرداری، اعتزازاحسن ، شیریں رحمان، قمرزمان کائرہ، حناربانی کھرو فرحت اللہ بابر، پاکستان تحریک انصاف نا شاہ محمود قریشی و شیریں مزاری ، جماعت اسلامی نا سراج الحق و صاحبزادہ طارق اللہ ، جمعیت علماء اسلام (ف) آن مولانا فضل الرحمان، متحدہ قومی موومنٹ نا ڈاکٹر فاروق ستار و خالدمقبول صدیقی، پختونخوا ملی عوامی پارٹی نا محمودخان اچکزئی ، نیشنل پیپلز پارٹی نا غلام مرتضیٰ جتوئی، پاکستان مسلم لیگ (ق) انا کامل علی آغا، مسلم لیگ فنکشنل نا غوث بخش مہر ، عوامی نیشنل پارٹی نا غلام احمد بلور و نیشنل پارٹی نا میر حاصل خان بزنجوآن بیدس انجینئر عثمان ترکئی، غازی گلاب جمال و پروفیسر ساجد میر شرکت کریر۔
داکان مست وزیراعظم محمد نواز شریف سیاسی کسرشون آتا وزیراعظم آفس آ بننگ آ اودفتے بخیر کرے۔ بنجائی کابینہ نا باسک آک ہم دیوان اٹی شرکت کریر۔ داوخت آ سیکرٹری خارجہ اعزاز احمد چوہدری دیوان نا شریک مروک آتے بھارتی مقبوضہ کشمیر اٹی انسانی حق انا خلاف ورزی تا حالیت آتیا بریفنگ تس۔ یات سلے کہ حکومت کیہی پارلیمانی پارٹی تا کسرشون آتے دیوان اٹی شرکت کن ہفتہ غا سلہ نامہ راہی کریسس۔
