اسلام آباد(پاکستان پوائنٹ نیوز 16 مئی 2018ء) اسپیکر قومی اسمبلی سردار ایاز صادق پارینے کہ ہر ادارہ ءِ تینا دنگ اٹ سلسا کاریم کروئی مرے ، وفاداری بدل کروک آ جماعت آتون وفادار اف تو ملک و قوم نا وفادار امرمریک، پارلیمنٹ اٹی اگہ نن کھینچا تانی کینہ تو اونا نتیجہ غاک جوان مفسہ، اِرامسہ شفاف الیکشن مس تو پین گچینی بریک، پارٹی تا تہٹی جمہوری طرز فکر ہمووخت آ سوگو مریک ہراتم خلقت شخصیت نا جاگہ غا منشور ءِ مون آ تخسا پارٹی تے وونٹ ایترہ۔
چارشنبے نادے پارلیمنٹری رپورٹر ایسوسی ایشن (پی آر اے) نا کنڈآن تینا اعزاز اٹی تروک آ بیابخیری دود آن تران کرسا اسپیکر سردار ایاز صادق پارے کہ 1977 ء آن پد ساڑی آ دور اٹی غٹ آن اہم کانود سازی مسنے، 2013ء آن 2018 ء اسکان ملک انا 14می قومی اسمبلی 136بل منظور کرے و 49 پوسکن ءُ کانود جوڑ کننگا، دافتیان غٹ آن ہم کانود سازی قرآن پاک نا لازمی تعلیم نا بل ءِ۔
داکان بیدس الیکشن ایکٹ، احوال آتسکان رسینگ تون اوار پین اہم کانود سازی کننگا۔ اوپارے کہ چار آئینی ترمیم آتے منظور کننگا ہرافتے ٹی ارٹ نا تعلق انسداد دہشت گردی و اِرٹ نا تعلق گچین کاری کانود آن ءِ۔ 16پرائیویٹ باسک بل منظور مس۔ اوپارے کہ دھرنہ غاتا زمانہ ٹی پی ٹی آئی نا استیفہ غاتا وخت او آئین، کانود و عدلیہ نا فیصلہ غاتے مون آ تخسا فیصلہ کرے۔
14می قومی اسمبلی ءِ شش بجٹ منظور کننگ نا اعزاز دوئی مسنے۔ اوپارے کہ قومی اسمبلی مچ آ سال انا بجٹ ءِ داخاطرآن پیش کرینے انتئے کہ داٹی دفاعی خڑچ و پنداوڑی تیان خراج آتا کٹوتی تتون اوار ایلو اہم معاملہ غاک ئسر۔ کنے حکومت نا کنڈآن دابابت است جم کننگانے۔ اوپارے کہ قومی سلامتی نا معاملہ غاتا چاروکی کن اپوزیشن نا خواست آ اونا کماشی ٹی پارلیمنٹ نا خصوصی کمیٹی اس جوڑ کننگا۔ 34کمیٹی تیان دہ کمیٹی نا چیئرمین ناتعلق اپوزیشن وخت اس کہ ایلو کمیٹی تا چیئرمین حکومت آن ئس۔
