اسلام آباد(پاکستان نیوز پوائنٹ 22ستمبر 2016ء) پاکستان و سویلی کوریا نا نیام اٹ آزادانہ واپاری معاہدہ غا مذاکرات بروک آ سال انا اولیکو سہ ماہی آن بناء مننگ نا گمان ءِ۔ بنجائی وزیر واپار انجینئر خرم دستگیر خان تون پاکستان اٹی ری پبلک آف کوریا نا سفیر ڈاکٹر ڈونگ گوسوہ اونا دفتر اٹی اوڑدہی کرے ہرانا وخت آ تین پہ تینی است خواہی و ہڑتوم آ کنڈآتا واپار نا بارواٹی معاملہ غاتیا خیال آتا درشانی ءِ کریر۔
بنجائی وزیر واپار سفیر ءِ آزادانہ واپاری معاہدہ ٹی پیش رفت نا بارواٹی پارے و اودے سئیول اٹی تدوک آ سال تینا دورہ ٹی مروک آ مذاکرات آن معلومدار کرے ہراڑآ ہڑتوم آ ملک آک آزادانہ واپاری معاہدہ نا قابل عمل مننگ نا مطالعاتی جاچ اکن پٹ و پولی سٹڈی آ اتفاق کریسر۔ ہڑتوم آ ملک آک دا سٹڈی ءِ پورو کرینو و اونا سفارشات آتے ہڑتوم آ تعلقدار حکومت آتے گدریفنگانے و داسا ہڑتوم آملک آتا نیام اٹ آزادانہ واپاری معاہدہ کن مذاکرات بروک آ سال انا اولیکو سہ ماہی آن بناء مننگ نا گمان ارے۔
ہڑتوم آ ملک آتا نیام اٹ ہڑتوم آ کنڈآتا واپاری کچ داوخت آ تقریباََ اسہ ارب 10 کروڑ ڈالر ءِ و ہڑتوم آ ملک آک واپار و زرکاری نا بشخ اٹی کمکاری ءِ پین مون آ دننگ نا خواہش نا درشانی ءِ کرینو۔ کورین سفیر تون اوڑدہی نا وخت آ بنجائی وزیر واپار خرم دستگیر خان مستی پارے کہ دا معاہدہ ملائیشیا و تھائی لینڈ تون آزادانہ واپاری و انڈونیشیا تون اولیتی واپاری معاہدہ کون آ معاہدہ ءِ وخت اس کہ دا غٹ معاہدہ غاک وزیراعظم محمد نواز شریف نا دے ٹکی مچ آ ایشیاٹی شون نا وژن نا رداٹ مسنو۔ کوریا نا سفیر وزیر واپار نا کوشست و واپار نا مون آ دننگ کن گام گیج آتا ستاءِ کرے و دارداٹ کمکاری ءِ ودفنگ نا خواہش نا درشانی ءِ کرینے۔
