اسلام آباد(پاکستان نیوزپوائنٹ 22مارچ2018ء) قرارداد پاکستان نا 78 سال پورو مننگ آ (اینو) جمعہ نا دے یوم پاکستان روایتی جوش و خروش و داعزم اتون اڈتننگ کہ قرارداد پاکستان ءِ مون آ تخسا ملک ءِ عظیم آن عظیم تر جوڑ کینہ۔ یوم پاکستان نا بنجائی دود پریڈ گراؤنڈ اٹی سہب انا 8 بجہ غا بناء کیک ہراٹی سلہہ بندفوج انا چاق و چوبند دستہ غاک سلامی ایترہ۔ دود انا مہمان خاص صدر مملکت ممنون حسین مریک وخت اس کہ دود اٹی وزیراعظم شاہد خاقان عباسی ، سروسز چیفس، بنجائی وزیر آک، درملکی سفارت کار آتیان بیدس بھلو کچ اسے ٹی مہمانک بشخ ہلیرہ۔
داوخت آ پاک فضائیہ نا شاہین تینا لائخی تا جوہر ءِ نشان ایترہ۔ داوخت آ مچ آ ملک اٹی لس چھٹی مریک۔ یوم پاکستان نا وخت آ ایوان صدر اٹی خصوصی دود اڈتننگانے ہراٹی چندی بشخ آتے ٹی نمان کارکڑد نشان تروک آ اہم شخصیت آتے اعزاز تننگک۔ داکان بیدس دے انا بناء بنجائی دارالحکومت اٹی 31 وخت اس کہ صوبائی دارالحکومت آتے ٹی 21، 21 توپ آتا سلامی اٹ مریک۔
پریڈ گراؤنڈ اٹی یوم پاکستان نا دود اکن مہمان تے دعوتی کارڈ جاری کننگانے ۔ یوم پاکستان نا پریڈ اٹی اوچ آتا دستہ اس ہم اوار کننگانے۔ داکان بیدس گرلز گائیڈ و سلہہ بند فوج اٹی اوار زالبول آتا دستہ ہم پریڈ اٹی بشخ ہلیک۔ یوم پاکستان نا وخت آ صدر ، وزیراعظم تون اوار اہم شخصیت آتا کلہو آتے شینک، نشر و ٹیلی کاسٹ کننگک۔ اخبار و ٹی وی چینل آتیا یوم پاکستان نا بابت خصوصی ایڈیشن و پروگرام نشر و ٹیلی کاسٹ کننگک۔ یات سلے کہ اینو آن 78 سال مست 23مارچ 1940 ء آ ساڑی آ مینار پاکستان نا ہند آ قرارداد پاکستان منظور کننگاسس۔
