اسلام آباد(پاکستان نیوز پوائنٹ 18اگست 2016ء) پاکستان انسٹیٹیوٹ آف میڈیکل سائنسز نا وائس چانسلر ڈاکٹر جاوید اقبال پارینے کہ کانگو وائرس آن زہمی سہدار تا سوتے بسنگ آن وائرس نا لاحق مننگ نا خلیس آک ختم مریرہ۔ پی ٹی وی تون ہیت وگپ کرسا اوپارے کہ سہدار تا چچڑہ غاتا کاٹنگ آن دتر اٹی ودی مروک آ کانگو وائرس آسانی اتون سہدار تون کاریم کروک آ انسان تیٹی منتقل مریک و ولدا آسانی اٹ انسان آن انسانی اٹی منتقل مریک ۔
اوپارے کہ انسان آتیٹی وائرس منتقل مننگ نا 5آن 6دے آن گڈ اونا نشانی کاٹم نا خل، دم درینگ و ال انا دروشم اٹ ظاہر مننگ شروع مریک واہم پین منہ دے گڈکانگو آن زہمی نا جون آن دتر تے کُننگ و دم ہلنگ اٹی تکلیف نا علامت ظاہر مننگ شروع مریک۔ اوپارے کہ کانگو وائرس نا نشانیک ظاہر مننگ آ زہمی بندغ نا خاہوت ، ایب و کیب نا خلقت ، بلاخصوص ڈاکٹر و ہیلتھ کیئر آ معمور بندغ ءِ لاحق مننگ کیک۔
ڈاکٹر جاوید اقبال پارے کہ بھلا عید انا بننگ بننگ ءِ و خلقت آتا گیشتری چناتے تون اوار منڈی تا پلو ءِ ہلیرہ ہراڑے سہدارتے دُوخلنگ و اوفتا دنان تے اُننگک۔ اوپارے کہ کانگو وائرس نا خلیس نا دروشم اٹی ہلوک آتے مرے کہ او منڈی تیٹی ہِننگ آن بیدس آن لائن خریداری کیر و سہد ار تے تڑنگ نا وخت آ تینا دوتے اٹ دستانہ و مون آ ماسک ضرور بینیر۔
