اسلام آباد(پاکستان نیوز پوائنٹ 17اگست 2016ء) پاکستان مسلم لیگ (ن) نا راہشون مائزہ حمید پارینے کہ قومی شناختی کارڈ انا دُوارہ تصدیق آن دہشت گردی نا سرجزآتا مون ءِ توننگ اٹی کمک رسینگک۔ ریڈیو پاکستان تون ہیت وگپ کرسا اوپارے کہ کوئٹہ ٹی پیش بروک آ ساڑی آ واقعہ ٹی قیمتی جان تا زیان اسہ سنجیدہ ءُ ویل اسے۔ اوپارے کہ پاکستان مسلم لیگ (ن) نا حکومت ملک ءِ دہشت گردی آن پاک جوڑ کننگ کن پرعزم ءِ۔
اوپارے کہ وزیراعظم محمد نواز شریف ہشت گردی نا پوروی اٹ چٹفنگ کن بڑزکو کہولی ٹاسک فورس اس اڈتننگ نا پڑوءِ کرینے ہرا نیشنل ایکشن پلان نا چاروکی ءِ کیک۔ مائزہ حمید پارے کہ سم کارڈ آتا تصدیق مہالو آن کننگانے واہم داسا شناختی کارڈ آتا دوارہ تصدیق نا عمل نا بناء کننگ انگ ءِ ہراڑآن دہشت گردی نا سرجزآتے کنٹرول کننگ اٹی کمک رسینگک۔ داوخت آ دفاعی جاچکار لیفٹیننٹ جنرل (ر) معین الدین حیدر پارے کہ فاٹا و گڑاس ایلو علاقہ غاتیٹی سرسہب آپریشن نا سوب دہشت گردی ٹی نمان کمتی خننگ انگ ءِ۔ اوپارے کہ نیشنل ایکشن پلان آ پورو وڑاٹ عملدرآمد کپننگ انگ ءِ واہم حالیت آتارداٹ اوڑآ نظرثانی نا گرج ءِ۔
