کوئٹہ(پاکستان نیوزپوائنٹ 16اگست 2016ء) بنجائی وزیر ڈٹ بندی و شونتری احسن اقبال پارینے کہ پاک چائنہ اقتصادی راہداری ڈٹ اٹی غٹ آن زیات بلوچستان و خیبرپختونخواہ ءِ اولیت تننگک، سی پیک ڈٹ ڈیہہ ٹی گیم چینجر اس ثابت مریک ، سی پیک ڈٹ دنیا نا توجوہ ءِ ہلکونے ، چین آن 46ارب ڈالر آن 35ارب ڈالر صرف توانائی نا ڈٹ آتیا خڑچ مریرہ۔ مسکوہی ٹی بلوچستان ءِ نظرانداز کننگاسس دا قومی جرم اٹی نن غٹ بریبر نا شریک اُن، داڈٹ اٹی غٹ آن زیات توجوہ توانائی نا ڈٹ آتے تننگانے دا عظیم ڈٹ انا بابت آن نن بایدے غلط فہمی نا گواچی مفن، بلوچستان اٹی جاری شونداری ڈٹ آک بنجائی حکومت نا کمک آن بروخت پورو کننگرہ۔
داخیال آتا درشانی ءِ او سے شنبے آ بلوچستان یونیورسٹی ٹی ہائرایجوکیشن کمیشن نا فنڈ آن جوڑجاڑ مروک آ ڈٹ آتا افتتاحی دود آن تران کرسا کرے۔ داوخت آ صوبائی وزیر تعلیم عبدالرحیم زیارتوال ، سیکرٹری تعلیم بلوچستان عمر بابر وائس چانسلر بلوچستان یونیورسٹی ڈاکٹر جاوید اقبال ہم ساڑی ئسر۔ بنجائی وزیر احسن اقبال دود آن تران کرسا پارے کہ وزیراعظم محمد نواز شریف نا شون نا وژن 2025ء ٹی بلوچستان اولیکو اولیت اٹی ءِ و بلوچستان اٹی جاری شونداری ڈٹ آک بنجائی حکومت نا کمک آن بروخت پورو کننگرہ۔
اوپارے کہ حکومت نا کوشست مریک کہ بلوچستان ءِ شون ترسا اوفتا ورناتے بڑزکو تعلیمی ادارہ غاتیٹی اسہ وڑ وارخواہی فراوان کننگک۔ اوپارے کہ گوادر کوئٹہ 650 کلومیٹر روڈ اینخو سال دسمبر اسکان پورو مریک وخت اس کہ گوادر نا پوسکنا ایئر پورٹ نا کاریم نا بناء کننگانے۔ بنجائی وزیر پارے کہ گوادر اٹی جدید انٹرنیشنل ایئر پورٹ، فری ٹریڈزون ، پی سی ہوٹل ، جدید ہسپتال ، فنی ادارہ و ماہی گیر آتے کن جدید تکنیکی ازباب و الس ءِ کنوئی صاف دیر انا فراوانی نا ڈٹ آتیا کاریم ترندی اٹ جاری ءِ ، پورو مروک آ ڈٹ آتا وزیراعظم محمد نواز شریف زوت افتتاح ءِ کیک۔
داکان مست بنجائی وزیر ڈٹ بندی و شونتری احسن اقبال بلوچستان یونیورسٹی ٹی ہائر ایجوکیشن کمیشن نا کمک آن جوڑ جاڑ مروک آ پوسکنا اکیڈمک بلاک و ارتھ کوئیک سٹڈیز نا افتتاح ءِ کرے۔ داوخت آ وائس چانسلر ڈاکٹر جاوید اقبال پارے کہ اینو آن مسہ سال مست بلوچستان یونیورسٹی نا استاد آتا تنخواک ملتوسہ و شونداری کاریم اس مسکہ۔ وزیراعظم محمد نواز شریف نا بلوچستان تون خصوصی است خواہی نا سوب بلوچستان یونیورسٹی نا ویل آک ایسر مننگ ءُ۔
اوبنجائی وزیر احسن اقبال ، چیئرمین ایچ ای سی ڈاکٹر مختار احمد نا کوشست آتا ستاءِ کرے۔ اوپارے کہ سی پیک نا بدولت بے روزگاری نا خاتمہ مریک، توانائی تنکی نا پورو چٹنگ آن بھاز انگا ویل آک ایسر مریرہ۔ اوپارے کہ بلوچستان یونیورسٹی صوبہ نا متکنا جامع ءِ، داسا ژوب ، گوادر، تربت ، پشین ، سبی ، نصیر آباد ، خضدار تون اوار ایلو ضلع غاتیٹی یونیورسٹی کیمپس ملنگ انگ ءِ تانکہ تعلیم نا پٹ اٹی بلوچستان نا ورناتے ہندی کہول آ بڑزکو تعلیم نا موقع دوبرے۔ دود انا ایسری آ سانحہ کوئٹہ کن دعاکننگا۔
